"2008 წელს MAP-ის არმიცემა შეცდომა იყო" - რასმუსენი NATO-ს საქართველო-უკრაინასთან მიმართებაში "კვიპროსის მოდელის" გამოყენებას სთავაზობს

პოლიტიკა - 14:22, 05 Apr, 2019

978

NATO-ს შეუძლია საქართველოსა და უკრაინასთან მიმართებაში „კვიპროსის მოდელი“ გამოიყენოს. ამ დროისთვის გაყოფილი კვიპროსი წარმო ადგენს ევროკავშირის და ავროზონის სრულფასოვან წევრს, უბრალოდ ევროკავშირის კანონმდებლობა არ ვრცელდება კუნძულის იმ ნაწილზე, რომელსაც ცენტრალური ხელისუფლება არ აკონტროლებს. ამ ინიციატივით ჩრდილო-ატლანტიკური ალიანსის ყოფილი გენერალური მდივანი ანდერს ფოგ რასმუსენი გამოვიდა.

ყოფილმა გენმდივანმა გამოცემა Project Syndicate-ში გამოაქვეყნა სტატია, რომელიც ნატოს ბლოკის შექმნის 70 წლის და ასევე ვარშავის შეთანხმების წევრი ქვეყნების ალიანსში მიღების 20 წლის იუბილეს ეძღვნებოდა (მეოთხე გაფართოების ფარგლებში ალიანსმა „ცივი ომის“ დასრულების შემდეგ თავის რიგებში მიიღო უნგრეთი, პოლონეთი და ჩეხეთი). რასმუსენის მოსაზრებით, „ღია კარის“ პოლიტიკა აუცილებლად უნდა გაგრძელდეს.

„ყოველ ჯერზე, როდესაც NATO-მ თავი შეიკავა, რუსეთმა წინ წაიწია.“- განაცხადა რასმუსენმა. ალიანსის ყოფილი გენმდივანი თვლის, რომ 2008 წლის ბუქარესტის სამიტზე ალიანსის წევრებმა შეცდომა დაუშვეს , როდესაც „გერმანიის და საფრანგეთის დაჟინების გამო“ საქართველო და უკრაინას MAP-ი არ მიანიჭეს.

„სამიტიდან რამდენიმე თვეში ვლადიმირ პუტინმა საქართველოში შეჭრის ბრძანება გასცა და მას შემდეგ აფხაზეთი და სამხრეთ ოსეთი რუსეთის მიერ არის ოკუპირებული.“- აღნიშნა რასმუსენმა.

ყოფილი გენმდივნის თქმით, ბრიუსელის მიერ დადგენილი კრიტერიუმები ნატო-ში გაწევრიანებას შეუძლებელს ხდის ტერიტორიული დავების მქონე ნებისმიერი ქვეყნისთვის. ამას კარგად აანალიზებს კრემლი და რეგულარულად აღვივებს გაყინულ კონფლიქტებს.

რასმუსენი მოუწოდებს ალიანსს გააცნობიეროს დამანგრეველი როლი, რომელსაც ნატოს გაფართოების საკითხში კრემლის პარანოია ასრულებს და აცხადებს, რომ არსებული სიტუაციის გათვალისწინებით, ბლოკის წევრ-ქვეყნებმა საქართველოს და უკრაინას უნდა შესთავაზონ უფრო მეტი, ვიდრე თბილი სიტყვებია, ალიანსის ყოფილი ხელმძღვანელი ასევე ვლის, რომ ბრიუსელმა რუსეთზე ზეწოლა უნდა გააძლიეროს, რათა მან წერტილი დაუსვას დონბასში კონფლიქტს და დატოვოს აფხაზეთი და სამხრეთ ოსეთი.