საქართველოს მოქალაქეს ირანში 74-ჯერ გამათრახება ემუქრება - სტრასბურგის სასამართლო ბულგარეთს მოუწოდებს მისი ირანში ექსტრადირება არ მოახდინოს

პოლიტიკა - 12:30, 05 Apr, 2019

1230

ადამიანის უფლებათა ევროპულმა სასამართლომ 1951 წელს დაბადებული საქართველოს მოქალაქის გ.ს-ს სარჩელთან დაკავშირებით დადგენილება გამოიტანა. საქართველოს მოქალაქემ, რომელიც სოფიის ციხეში იმყოფება, სარჩელი ბულგარეთის სახელმწიფოს წინააღმდეგ შეიტანა, რათა ის არ დაექვემდებაროს ირანში ექსტრადირებას, სადაც ის ქურდობაშია ბრალდებული.

საქართველოს მოქალაქის ირანში ექსტრადირების შემთხვევაში მას 74-ჯერ გამათრახება ემუქრება. სტრასბურგის სასამართლო ბულგარეთს მოუწოდებს ექსტრადირებისგან თავი შეიკავოს, რადგან განმცხადებელი შესაძლოა არაადამიანურ ან დამამცირებელი მოპყრობას დაექვემდებაროს.

იმის მიუხედავად, რომ ირანის ხელისუფლება ბულგარეთს არწმუნებს, რომ გ.ს არაადამიანურ ან დამამცირებელი მოპყრობას არ დაექვემდებარება, სტრასბურგის სასამართლო მიიჩნევს, რომ გარანტიები ისეთი ქვეყნისგან, სადაც ასეთი მოპყრობა მუდმივად ხდება, სიფრთხილით უნდა იქნას მიღებული.

გ.ს სოფიას აეროპორტში 2016 წლის დეკემბერში ინტერპოლის წითელი ცირკულარის საფუძველზე დააკავეს, როდესაც ის საქართველოდან ბულგარეთში ჩავიდა.

ინტერპოლზე გამოქვეყნებული ინფორმაციის თანახმად, მან 2016 წელს თეირანში მდებარე გაცვლითი პუნქტიდან 50 ათასი ევრო მოიპარა, აღნიშნული დანაშაული ირანის კანონმდებლობით თავისუფლების აღკვეთას ითვალისწინებს. ირანისგან ექსტრადირების მოთხოვნა ბულგარეთმა 2017 წელს მიიღო, აპრილის თვეში კი სოფიას საქალაქო სასამართლომ ექსტრადიციის მოთხოვნაზე დადებითი პასუხი გასცა, რადგან ჩათვალა რომ ის ყველა ნორმას აკმაყოფილებდა, თუმცა ექსტრადიციის პროცესი 2017 წლის მაისში შეჩერდა სტრასბურგის სასამართლოს დროებითი ღონისძიებების საფუძველზე.