11-მა გავლენიანმა ევროპარლამენტარმა ფედერიკა მოგერინის წერილი მისწერეს, სადაც საუბარია საქართველოს საარჩევნო სისტემაზე, რომელიც პროპორციულზე არა 2024 წელს არამედ 2020 წლისთვის უნდა გადავიდეს, მოგერინიმ კი აღნიშნულისთვის შესაბამისი ნაბიჯები უნდა გადადგას.

დღეს გამართულ ბრიფინგზე ბახტაძემ ევროპარალმენტარების აღნიშნულ წერილზე საუბრისას განაცხადა, რომ საქართველოს კონსტიტუციაში გაწერილია კონკრეტული თარიღი თუ როდის გადავა ქვეყანა პროპორციულ საარჩევნო სისტემაზე:

„საკითხს პროპორციულ არჩევნებზე, პასუხი გაეცა, თუ სწორად მახსოვს 2016 წელს, როდესაც ეს ინიციატივა, ეს იდეა იდგა. მინდა საზოგადოებას კიდევ ერთხელ ვუთხრა, ისევე როგორც ჩვენს საერთაშორისო პარტნიორებს, რომ სწორედ „ქართული ოცნება“ არის ის პოლიტიკური გუნდი, რომელმაც რეალურად ეს იდეა მიიყვანა კონკრეტულ შედეგებამდე, რომ საქართველო აუცილებლად გადავა პროპორციული არჩევნების სისტემაზე. 2016 წელს ეს საკითხი იდგა და სამწუხაროდ ჩვენმა ოპონენტებმა მას მხარი არ დაუჭირეს, ჩემთვის დღემდე გაურკვევლია თუ რა იყო მათი მოტივაცია. ჩვენ გვაქვს კონსტიტუცია, სადაც გაწერილია კონკრეტული ვადებით თუ როდის გადავა საქართველოს პროპორციული არჩევნების სისტემაზე“, - განაცხადა მამუკა ბახტაძემ.