11-მა გავლენიანმა ევროპარლამენტარმა საქართველოს პრემიერ-მინისტრს წერილი გაუგზავნა, რომელშიც ზუგდიდის მეექვსე საჯარო სკოლის დირექტორის, ია კერზაიას გარდაცვალების საქმეზეა საუბარი. წერილში ევროპარლამენტარები საქმის სწრაფად გამოძიების აუცილებლობაზე საუბრობენ.

ევროპარლამენტის პორტუგალიელი დეპუტატის, ანა გომესის განცხადებით, ცნობილია, რომ მომხდარი იყო შურისძიება კერზაიას უარზე, ელაპარაკა მთავრობის მიერ მხარდაჭერილი პრეზიდენტობის კანდიდატის სასარგებლოდ:

„შემაშფოთებელია მინიშნებები, რომ ინსულტი უზარმაზარი სტრესის გამო იყო გამოწვეული, მიზეზი კი განათლების სამინისტროს მიერ ჩატარებული მოულოდნელი შემოწმებები გახდა. შემაშფოთებელია ისიც, რომ ია კერზაიას თანამდებობიდან მოხსნის რეკომენდაციებიც გაიცა. მიუხედავად იმისა, რომ ეს ადამიანი თავის საქმეს კარგად აკეთებდა. რამდენადაც ცნობილია, ეს იყო შურისძიება უარზე, ელაპარაკა მას მთავრობის მიერ მხარდაჭერილი პრეზიდენტობის კანდიდატის სასარგებლოდ. ზეწოლა შემაშფოთებელია, მაგრამ უფრო შემაშფოთებელია შურისძიება. შედეგი კატასტროფული დადგა. ის ფაქტი, რომ განათლების სამინისტროს ინსპექტორებს ამგვარი ქმედებებისთვის იყენებენ, რაც არანაირად შეესაბამება დემოკრატიული არჩევნების კონტექსტს, ძალიან სერიოზული საქმეა და საჭიროებს სათანადო გამოძიებას, პასუხისმგებლობის დაკისრებას და იმის გარანტირებას, რომ აღარასდროს განმეორდება,“ - განაცხადა ანა გომესმა.