11 გავლენიანი ევროპარლამენტარის წერილი საქართველოს პრემიერ-მინისტრსა და ფედერიკა მოგერინის - წერილებში საუბარია ია კერზაიას გარდაცვალების საქმეზე, საპრეზიდენტო არჩევნებზე დაფიქსირებულ დარღვევებსა და 2020 წლისთვის პროპორციულ საარჩევნო სიტემაზე გადასვლის აუცილებლობაზე.

ევროპარლამენტის პორტუგალიელი დეპუტატის, ანა გომესის განცხადებით, აუცილებელია საარჩევნო სისტემასთან დაკავშირებით, საქართველოს ხელისუფლებამ ოპოზიციასთან დიალოგი აწარმოოს. როგორც გომესმა "კურიერთან" საუბრისას განაცხადა, ევროპარლამენტართა მწვავე შეფასებები გამოწვეულია იმით, რომ მათ სურთ საქართველო უკეთესი ქვეყანა გახდეს:

„წერილით ფედერიკა მოგერინის, ფაქტობრივად შევთავაზეთ, დიალოგის ფორმატში წამოვწიოთ დისკუსია მთავრობასა და ოპოზიციას შორის, რადგან სწორედ ისინი უნდა შეთანხმდნენ. ეს წერილი გავუგზავნეთ, რადგან ვღელავთ. ვეთანხმებით ვენეციის კომისიის და სხვების შეფასებებს, რომ არსებული სისტემა უპირატესობას უმრავლესობას ანიჭებს. ეს კი აზიანებს დემოკრატიულ პროცესებს. გვაღელვებს, რომ შესაძლოა, გადაიდოს 2024 წლის არჩევნებისთვის. საჭიროა ფართო თანხმობა მთავრობასა და ოპოზიციურ ძალებს შორის. ჩვენი მოვალეობაა, მოვუწოდებთ მხარეებს, დასხდნენ მაგიდასთან და განიხილონ. ეს არის საკითხი, რომელიც არ უნდა გადაიდოს.

ჩვენ საქართველოს მეგობრები ვართ და კრიტიკა მხოლოდ თქვენი ქვეყნის გაუმჯობესებას ემსახურება. ვიცით, რომ ქართველ ხალხს ნამდვილ დემოკრატიულ ქვეყანაში ცხოვრება სურთ, ამიტომ არ უნდა დავმალოთ, რაც მიუღებელია. ისინი უნდა მოგვარდეს. როგორც მეგობრები, ვალდებულები ვართ, გამოვხატოთ ჩვენი შეშფოთება და მივუთითოთ ხელისუფლებას, რა არის სწორი,“ - განაცხადა ანა გომესმა.