11-მა გავლენიანმა ევროპარლამენტარმა საქართველოს პრემიერ-მინისტრს მამუკა ბახტაძეს წერილი მისწერა, რომელშიც ისინი ია კერზაიას საქმის დროულად გამოძიებას მოითხოვენ.

აღნიშნულს მმართველი გუნდის წევრი გია ვოლსკი ეხმაურება და აცხადებს, რომ ევროპარლამენტარები არიან მეგობართა ჯგუფი და აღნიშნულ საკითხთან დაკავშირებით დამატებითი ინფორმაცია სჭირდებათ:

„ამ საკითხზე კითხვები აბსოლუტურად გასაგებია. ეს არის სხვადასხვა ფრაქციების წარმომადგენლების წერილი. იქვე მითითებულია, რომ ეს არის მეგობართა ჯგუფი, რომელიც საქართველოს მხარს უჭერს, გულშემატკივრობს მას და ამ საკითხთან დაკავშირებით სჭირდებათ დამატებით ინფორმაცია. პრემიერ-მინისტრის სახელზე გაგზავნილი ეს წერილი, ვფიქრობ, არა თუ უყურადღებოდ დარჩება, არამედ საკმაოდ კომპეტენტურ პასუხსაც მიიღებს,“ - განაცხადა გიორგი ვოლსკიმ.

მისივე თქმით, ის არ ეთანხმება გავრცელებულ მოსაზრებას, რომ ქვეყანაში სისტემურ დანაშაულს აქვს ადგილი:

„ის, რომ სისტემურ დანაშაულზე იყოს ლაპარაკი, მე მგონია, რომ ამ თემას კარგად უნდა გადახედოს თქვენმა ტელეკომპანიამაც და იმ ხალხმა, ვინც საერთოდ სისტემურ დანაშაულზე ლაპარაკობს, რომლებმაც შექმნეს ადამიანის უფლებების დამთრგუნველი სისტემა და უამრავი ადამიანი სიცოცხლეს გამოასალმეს და ჯანმრთელობა მოუსპეს,“ - აცხადებს გიორგი ვოლსკი.