ია კერზაიას საქმე, დარღვევები საპრეზიდენტო არჩევნებისას და პროპორციულ სისტემაზე გადასვლა 2020 წლისთვის - 11-მა გავლენიანმა ევროპარლამენტარმა აღნიშნული საკითხების შესახებ წერილები საქართველოს პრემიერ-მინისტრსა და ფედერიკა მოგერინის მისწერა.

„ნიუპოსტთან“ საუბრისას გაერთიანებული ოპოზიციის „ძალა ერთობაშიას“ წევრი გიორგი ბარამიძე აღნიშნავს, რომ ევროპარლამენტარებმა წერილებით საქართველოს ხელისუფლებას, ფაქტობრივად, ვერდიქტი გამოუტანეს და საქართველოს მოსახლეობამ უნდა გადაწყვიტოს თუ რა დამოკიდებულება ექნება მმართველი გუნდის მიმართ.

„ამ საქმემ იმდენად დიდი რეზონანსი შეიძინა, რომ უკვე ევროპარლამენტარებიც კი აუცილებლად თვლიან, რომ ხელისუფლებისადმი გამოგზავნილ ამ გზავნილში და ევროპარლამენტის აღმასრულებელი სტრუქტურებისადმი მიმართვაში იყოს ეს საკითხი მოხსენიებული, როგორც თემა, რომლითაც ევროკავშირი უნდა დაელაპარაკოს საქართველოს მთავრობას. ევროპარლამენტარები ავალდებულებენ ევროკავშირის ხელმძღვანელობას, ამ თემებზე გაამახვილოს ყურადღება საქართველოს ხელისუფლებამ, ეს არის ძალიან შემაშფოთებელი. ეს თემა სწორედ იმ კონტექსტშია გამოყოფილი, რომ არჩევნები ჩატარდა ისეთ გარემოში, როდესაც ადამიანი ტერორის ქვეშ გარდაიცვალა. ფაქტობრივად, იქნა მოკლული. თუ იმასაც გავითვალისწინებთ, რომ ეუთომ ზოგადი შეფასება მისცა, რომ საქართველოში ჩატარებული საპრეზიდენტო არჩევნები იყო არასამართლიანი, რომელსაც იზიარებს ევროკავშირი, სურათი გვაქვს ძალიან მძიმე. შეიძლება ითქვას, რომ ევროპარლამენტარების მხრიდან ამ ხელისუფლებას ვერდიქტი აქვს გამოტანილი, რაც ბუნებრივია, უკვე ქართველი ხალხის გადასაწყვეტია, როგორ დამოკიდებულებას გამოხატავს ამ ხელისუფლებასთან მიმართებით“, - განაცხადა ბარამიძემ.

მისივე თქმით, ნაკლებად სავარაუდოა ხელისუფლების მხრიდან ევროპარლამენტართა შეხედულებების გათვასლისწინება, რადგან მას ქართველი ხალხის აზრიც კი არ აინტერესებს.

„ვფიქრობ, რომ ხელისუფლებისთვის სულერთია მთელი პოლიტიკური სპექტრისა და არასამთავრობოების დამოკიდებულება, ცუდია რომ მას ევროპარლამენტარების აზრი არ აინტერესებს და უფრო შემაშფოთებელია ის, რომ საქართველოს მოსახლეობის აზრი არ აინტერესებს“, - დასძენს ბარამიძე.