მამუკა ხაზარაძემ და ბადრი ჯაფარიძემ "თიბისი ბანკის" სამეთვალყურეო საბჭო დატოვეს

პოლიტიკა - 11:06, 03 Apr, 2019

849

„თიბისი ბანკის“ დამფუძნებლებმა მამუკა ხაზარაძემ და ბადრი ჯაფარიძემ ბანკის სამეთვალყურეო საბჭო დატოვეს. მათ საბჭოს დატოვებაზე ოფიციალური განაცხადი 2 აპრილს წარადგინეს.

"თიბისი ბანკის" აქციონერებს 13 აპრილს ეწურებოდათ საქართველოს ეროვნული ბანკის მიერ მიცემული ორთვიანი ვადა, რომლის განმავლობაშიც ხაზარაძე და ჯაფარიძე საბჭოდან უნდა გაეწვიათ. საბანკო ჰოლდინგის ცნობით, „თიბისი ბანკის” სამეთვალყურეო საბჭოში ორი ახალი წევრის შერჩევა უკვე მიმდინარეობს.

საქართველოს ეროვნულმა ბანკმა 13 თებერვალს მიიღო გადაწყვეტილება, რომლის თანახმადაც ხელმოწერის უფლება შეუჩერა „თიბისი ბანკის“ სამეთვალყურეო საბჭოს თავმჯდომარეს, მამუკა ხაზარაძეს და მის მოადგილეს, ბადრი ჯაფარიძეს და ბანკის აქციონერთა კრებას ორთვიანი ვადა მისცა მათი სამეთვალყურეო საბჭოდან გაწვევისთვის.

ეროვნულმა ბანკმა ამ გადაწყვეტილების საფუძვლად დაასახელა „თიბისი ბანკის“ შემოწმებისას დაფიქსირებული, ინტერესთა კონფლიქტის მარეგულირებელი კანონმდებლობის დარღვევის ფაქტები, რომლებიც 2007-2008 წლების ტრანზაქციებს უკავშირდება. მანამდე ეროვნულმა ბანკმა "თიბისი ბანკი" მილიონი ლარით დააჯარიმა.

ბანკის სამეთვალყურეო საბჭოს დატოვების მიუხედავად, ხაზარაძე და ჯაფარიძე საკუთარ პოსტებს შეინარჩუნებენ „თიბისი ბანკის” მფლობელ კომპანიაში – TBC Bank Group PLC .