ბაჩანა შენგელიას დაზარალებულის უფლებამონაცვლედ ცნობაზე უარი უთხრეს

პოლიტიკა - 10:30, 03 Apr, 2019

670

ზუგდიდის მეექვსე საჯარო სკოლის გარდაცვლილი დირექტორის, ია კერზაიას შვილს, ბაჩანა შენგელიას პროკურატურაში უარი უთხრეს დაზარალებულის უფლებამონაცვლედ ცნობაზე.

ბაჩანა შენგელია აპირებს, რომ საქმის პროკურორის გადაწყვეტილება გაასაჩივროს გენერალურ პროკურორთან, შალვა თადუმაძესთან.

შენგელიას ინფორმაციით, უარის მთავარ მიზეზად ის დაუსახელეს, რომ საქმის მასალები სამხარაულის ექსპერტიზის ბიუროშია გაგზავნილი.

ბაჩანა შენგელიას განცხადებით, დაზარალებულის უფლებამონაცვლის სტატუსი მისცემდა საქმის მასალების გაცნობის და საპროცესო მოქმედებების შესაძლებლობას, რაც სააშკარაოზე გამოიტანდა გამოძიების უმოქმედობას

"ეს ემსახურება მხოლოდ და მხოლოდ ერთ რაღაცას - თუ მომცემენ ამ სტატუსს შესაბამისად მე მექნება წვდომა საქმის მასალებზე, მე ვიქნები მხარე ამ საქმეში და მე მექნება უფლება რომ ვაწარმოო პროცესუალური მოქმედებები, რაც ბუნებრივია მათ არ აწყობთ, ვინაიდან უკვე სააშკარაოზე გამოვა მათი უმოქმედობა, რაც ამდენი ხანია გრძელდება. მე ვფიქრობ, რომ ეს უარი განპირობებულია მხოლოდ და მხოლოდ საქმის გამოძიებისთვის ხელის შეშლით."-განაცხადა ბაჩანა შენგელიამ.

ზუგდიდის მე-6 საჯარო სკოლის დირექტორი ია კერზაია გასული წლის დეკემბერში გარდაიცვალა. მისი შვილი დედის გარდაცვალებას პოლიტიკურ ზეწოლას უკავშირებს.