სოფელ ყარაჯალაში საძოვრების დაბრუნების მოთხოვნით საპროტესტო აქცია გაიმართა. მოსახლეობა 16 ჰექტარი ტერიტორიის კერძო პირზე გასხვისებას უკანონოს უწოდებს და მიწების სოფლისთვის გადაცემას ითხოვს. აქციაზე თელავის მერი და „ნაციონალური მოძრაობის“ წარმომადგენელი ერთმანეთს შეეკამათნენ. ენმ-ს წევრმა გიორგი ბოტკოველმა თელავის მერს, შოთა ნარეკლიშვილს "მატყუარა" უწოდა, რის გამოც აქციაზე ვითარება რამდენჯერმე სიტყვიერ დაპირისპირებაში გადაიზარდა.

„დღევანდელი ხელისუფლება ყოველ დღე გვანახებს, რომ ესენი არიან თაღლითები და ამათ ხელისუფლებასთან და სამთავრობო ხელმისაწვდომობასთან არაფერი არ აქვთ. აღნიშნულმა ხელისუფლებამ წინასაარჩევნოდ მეორე ტურში თაღლითურად ჩაიდინა 4 უკანონო ქმედება, რომლითაც მიწა, რომელზეც თვითონ ამბობენ, რომ უკანონოდ იყო გადაცემული თურმე კონკრეტულ პიროვნებაზე, გადაიტანა თავის საკუთრებაში და მოატყუა სოფელი, რომ, თითქოს, დაუბრუნა ეს სოფელს, მაგრამ აღნიშნულ პიროვნებას იქვე 10 ჰექტარი საძოვარი მისცა. ეს არის პირდაპირ დანაშაული როგორც ადგილობრივი, ასევე ცენტრალური ხელისუფლებისგან,“ - განაცხადა გიორგი ბოტკოველმა.

თელავის მერმა, შოთა ნარეკლიშვილმა პროცესს მართული უწოდა და განაცხადა, რომ საძოვრების საკითხი აუცილებლად მოსახლეობის სასარგებლოდ გადაწყდება.