საქართველოს განათლების, მეცნიერების, კულტურისა და სპორტის მინისტრმა, მიხეილ ბატიაშვილის განცხადებით, ეროვნული სიმფონიური ორკესტრის ხელმძღვანელის, ნიკოლოზ რაჭველის გათავისუფლება არ განიხილება

მიხეილ ბატიაშვილი ფილარმონიის ირგვლივ მიმდინარე მოვლენებს ეხმაურება და აცხადებს, რომ თბილისის საკონცერტო დარბაზის ბედს უახლოეს მომავალში გადაწყვეტენ.

„ფილარმონია, რაც ყველაზე მთავარია, უნდა იყოს ორიენტირებული იმისთვის, რომ უნდა ემსახურებოდეს ქალაქის კულტურულ და აქტიურ ცხოვრებას. ამიტომ, ეს ორი თემა, როგორც ვთქვი, რომ ერთი არის ყველაზე მნიშვნელოვანი, რომ გადაწყვეტილება ქალაქის ინტერესებიდან იქნება მიღებული და მეორე, რომ ნიკას ასეთი განცხადება ვრცელდებოდა, ნიკას გათავისუფლების შესახებ. პირდაპირ შემიძლია გითხრათ, რომ არ განხილულა და ახლაც არანაირად არ განიხილება ეგ საკითხი,“ - განაცხადა მიხეილ ბატიაშვილმა.

ცნობისთვის, ნიკოლოზ რაჭველის გათავისუფლება კი არ გამორიცხა განათლების, მეცნიერების, კულტურისა და სპორტის მინისტრის მოადგილემ, მიხეილ გიორგაძემ. მისი თქმით, თუ ეროვნული ორკესტრის თავშესაფრის პრობლემა დროულად არ მოგვარდება, მაშინ გამორიცხული არ არის, რომ ნიკოლოზ რაჭველის „დაკავებული პოზიციის შესაბამისობის საკითხი დადგეს“.