საქართველოს პრემიერ-მინისტრმა მამუკა ბახტაძემ დღეს ბრიფინგი გამართა, რომლის ფარგლებშიც აღნიშნა, რომ საქართველოს განათლების, მეცნიერების, სპორტისა და კულტურის სამინისტროს მიერ განსაზღვრული პროექტების შესაბამისად, კერძო საგანმანათლებლო დაწესებულებები ვაუჩერულ დაფინანსებას მიიღებენ:

„დღეს, მთავრობის სხდომაზე, განათლების რეფორმის ფარგლებში, შემოგვაქვს რამდენიმე სიახლე. სახელმწიფოს მხრიდან აქამდე მხოლოდ სახელმწიფო პროფესიული სასწავლებლები ფინანსდებოდა, რაც რა თქმა უნდა, არ იყო საუკეთესო პრაქტიკა. ჩვენ ვახორციელებთ ცვლილებებს, რომლის მიხედვითაც დაფინანსდებიან კერძო საგანმანათლებლო დაწესებულებები. ჩემთვის განსაკუთრებით მნიშვნელოვანია, რომ ჩვენ გვქონდეს ისეთი პროფესიული სასწავლებლების სისტემა, რომელიც უზრუნველყოფს ახალგაზრდების მყისიერ დასაქმებას, მას შემდეგ, რაც გაივლიან პროფესიულ სწავლებას და აქედან გამომდინარე, ძალიან სასიხარულოა, რომ უფრო და უფრო მეტი კერძო კომპანია ცდილობს აქტიურად იყოს ჩართული პროფესიულ სწავლებაში. საქართველოს განათლების, მეცნიერების, სპორტისა და კულტურის სამინისტროს მიერ განსაზღვრული პროექტების შესაბამისად, ეს სასწავლებლები მიიღებენ ვაუჩერულ დაფინანსებას. აქედან გამომდინარე, კერძო პროფესიულ სასწავლებლებში ჩარიცხული სტუდენტებიც, რომლებიც გამოცდების ეროვნული ცენტრის გამოცდების მიხედვით ჩაირიცხებიან, მიიღებენ სახელმწიფოს მხრიდან ვაუჩერულ დაფინანსებებას. ამასთან ერთად, იგეგმება პროფესიული მასწავლებლების ანაზღაურების ზრდა 30 %-ით“, - განაცხადა პრემიერ მინისტრმა.