"ეროვნული ბანკის რეგულაციები შესარბილებელია" - საპარლამენტო უმრავლესობის დეპუტატი

პოლიტიკა - 14:35, 28 Mar, 2019

927

საპარლამენტო უმრავლესობის დეპუტატის ილია წულაიას თქმით, ეროვნული ბანკის რეგულაციები შესარბილებელია. მისი თქმით, ბანკები უფრო მეტად უნდა აფინანსებდნენ მშენებლებს და ნაკლები უნდა იყოს მათი თანამონაწილეობა. წულაიამ შიდა განვადების საკითხზეც გაამახვილა ყურადღება და განაცხადა, რომ ეს არ არის დეველოპერული ბიზნესის საქმე:

„ვისურვებდი, რომ ბანკები უფრო მეტად აფინანსებდნენ მშენებლებს და ნაკლებ თანამონაწილეობას ითხოვდნენ ბიზნესისგან, რაც უფრო განავითარებდა ამ სფეროს და გააჯანსაღებდა. ვფიქრობ რომ ეროვნული ბანკის რეგულაციები შესარბილებელია და უფრო მეტად ლიბერალიზაცი უნდა მოხდეს ამ რეგულაციების. ეროვნული ბანკი მზად არის ამისთვის, იმ სახით რეგულაციები რაც დღეისთვის არსებობს უნდა შეიცვალოს, მე დარწმუნებული ვარ ეროვნული ბანკი ამას გააანალიზებს და უახლოეს მომავალში შესაბამისი რეაგირება ექნება.“- განაცხადა წულაიამ.

შეგახსენებთ, რომ მიმდინარე წლის იანვრიდან ძალაში შევიდა ფიზიკური პირების დაკრედიტების ახალი წესი, რომელიც შემოსავლების დადასტურების გარეშე სესხის გაცემას კრძალავს. ამასთან დაწესდა ზღვრები- შემოსავლის რა ნაწილი შეიძლება იყოს მიმართული სესხის მომსახურებისთვის. მენაშენეების შეფასებით, საბანკო რეგულაციებმა, რომელიც ეროვნულმა ბანკმა მიიღო, დააზიანა საქართველოს ეკონომიკა, შეამცირა მშპ, გაანახევრა შესყიდვები დეველოპერულ სექტორში და ა.შ.