გურამ თუშიშვილი ორთვიანი დისკვალიფიკაციით დასაჯეს - რა გახდა მსოფლიო ჩემპიონის დასჯის მიზეზი

სპორტი - 14:10, 27 Mar, 2019

4524

ძიუდოს საერთაშორისო ფედერაციის - IJF - გადაწყვეტილებით გურამ თუშიშვილი ორთვიანი დისკვალიფიკაციით დაისაჯა და 25 მაისის ჩათვლით ვერსად იასპარეზებს.

მძიმეწონოსანი მსოფლიოს ჩემპიონი დაგეგმილ შეჯიბრებებთან ერთად ვერც თბილისის გრან პრიზე გამოვა, რომელიც ზეგ, 29 მარტს იწყება.

ამის მიზეზი გახდა ქართველი სპორტსმენის მონაწილეობა შარშან ყაზახეთში გამართულ კურაშის მსოფლიოს ჩემპიონატზე. ძიუდოს საერთაშორისო ფედერაციის ახალი დებულების მიხედვით ძიუდოისტებს, რომლებიც არიან ძიუდოს საერთაშორისო რეიტინგში, სპორტის სხვა ძალისმიერ სახეობებში მონაწილეობა ეკრძალებათ.

აღნიშნულ საკითხს საქართველოს ძიუდოს ფედერაცია გამოეხმაურა:

"საქართველოს ძიუდოს ფედერაცია ძიუდოს საერთაშორისო ფედერაციის დებულების შესახებ, რომელიც კრძალავს ნებართვის გარეშე ძიუდოისტების მონაწილეობას სხვა ძალისმიერ სპორტის სახეობებში გამართულ საერთაშორისო შეჯიბრებებში, ინფორმირებული იყო. უფრო მეტიც, სანამ საერთაშორისო ფედერაცია ამ დებულებას მიიღებდა, საქართველოს ძიუდოს ფედერაციამ 2014 წელს თავად მიიღო დებულება, რომელიც საქართველოს ნაკრების წევრებს სპორტის სხვა ძალისმიერ სახეობებში შეთანხმების გარეშე მონაწილეობას უკრძალავდა. გურამ თუშიშვილის შემთხვევაში, კურაშის მსოფლიოს ჩემპიონატზე სპორტსმენის მონაწილეობის შესახებ საქართველოს ძიუდოს ფედერაცია ინფორმირებული არ იყო და თუშიშვილი ყაზახეთში გაემგზავრა დამოუკიდებლად."- ნათქვამია განცხადებაში.