"არც მკითხეთ, ვეთანხმებოდი თუ არა ადვოკატს მოსამართლის აცილებასთან დაკავშირებით, ყველაფერი წინასწარ თეთრი ძაფით არის შეკერილი“- კირკიტაძე

პოლიტიკა - 12:55, 27 Mar, 2019

788

გურჯაანის რაიონულ სასამართლოში გაერთიანებული ოპოზიციის „ძალა ერთობაშიას“ ერთ-ერთი ლიდერის დავით კირკიტაძის სასამართლო პროცესი მიმდინარეობს. სასამართლომ ადვოკატის შუამდგომლობა, მოსამართლის აცილებასთან დაკავშირებით არ დააკმაყოფილა. როგორც მოსამართლე ნუნუ ნემსიწვერიძემ განმარტა, ადვოკატს საფუძვლიანი დასაბუთება არ წარუდგენია.

სიტყვა წარმოთქვა დავით კირკიტაძემ და განაცხადა, რომ ისევე, როგროც სხვა პროცესებზე, მისი უფლებები დღესაც დაირღვა:

„როგორ უნდა ვირწმუნო თქვენი ან მე ან საზოგადოებამ, როდესაც ყოველ სასამართლო პროცესზე ირღვევა ჩემი უფლებები. როგორ არ უნდა ვიფიქრო, რომ თქვენ ხართ მიუკერძოებელი. მე, როგორც ბრალდებულს, რა განცდა უნდა მქონდეს, რომ სასამართლო არის სამართლიანი. რა აზრი აქვს პროცესებზე დასწრებას ან მტკიცებულებების წარდგენას. მაშინ როდესაც ჩემი საქმის მიმართ ამხელა საზოგადოებრივი ინტერესია და ასე არღვევთ ჩემს უფლებებს, საზოგადოება კარგად განსჯის და წარმოიდგენს, რა ხდება იმ პროცესებზე, სადაც არ არის ამხელა საზოგადოებრივი ინტერესი, სადაც აქტიურად არ შუქდება პროცესები. თქვენ იუსტიცის უმაღლესმა საბჭომ უვადოდ მოგანდოთ ადამიანების ბედი და თქვენ კიდევ ყველა ფეხის ნაბიჯზე არღვევთ მათ უფლებებს.

თუნდაც დღეს, ისე გახვედით სასამართლო დარბაზიდან, არც მკითხეთ ვეთანხმებოდი თუ არა ჩემი ადვოკატის მიერ დაყენებულ შუამდგომლობას, მოსამართლის აცილებასთან დაკავშირებით. ცხადია, ეს ყველაფერი წინასწარ თეთრი ძაფით არის შეკერილი“, - აღნიშნა დავით კირკიტაძემ.