"ნატოსა და ევროკავშირისკენ სწრაფვა საერთო ინტერესებში შედის, ამ ოჯახში ჩვენ მშვიდობა, უსაფრთხოება და ერთად თანაცხოვრება გვექნება"- სესიაშვილი ოკუპირებულ ტერიტორიებზე მცხოვრებ თანამოქალაქეებს

პოლიტიკა - 14:43, 26 Mar, 2019

631

აფხაზეთის საოკუპაციო რეჟიმის ე.წ საგარეო საქმეთა სამინისტრო საქართველოში ჩატარებულ სამხედრო სწავლებას ეხმაურება, რომელშიც მონაწილეობას იღებდნენ NATO-ს წევრი 24 ქვეყანა და მათი პარტნიორები. საოკუპაციო რეჟიმი აღნიშნულ სწავლებას „ეროვნული უსაფრთხოების ღია გამოწვევად“ აფასებს და „მოუწოდებს თბილის და ბრიუსელს გააცნობიერონ თუ რამდენად მავნებელია სამხედრო ამბიციების ასეთი ღია დემონსტრირება.“

აღნიშნულს საქართველოს პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი გამოეხმაურა და განაცხადა, რომ ოკუპირებულ აფხაზეთში მცხოვრებნი კარგად ხვდებიან, რომ ნატოსკენ სწრაფვა საერთო ინტერესებში შედის:

„სეპარატისტული ხელისუფლების განცხადებებზე კომენტარს არ გავაკეთებ. მაგრამ ჩვენს აფხაზ და ოს ძმებს და ოკუპირებულ ტერიტორიებზე მცხოვრებ ჩვენს თანამოქალაქეებს მინდა, ვუთხრა, რომ ნატო და ევროკავშირი ეს ის ჩვენი საერთო ოჯახია, სადაც ჩვენ მშვიდობა, უსაფრთხოება, სტაბილურობა, კეთილდღეობა და ერთად თანაცხოვრება გვექნება.

ამიტომ, პირველ რიგში, მაქვს განცდა და მოლოდინი, რომ იქ მცხოვრები ჩვენი თანამოქალაქეები კარგად ხვდებიან, რომ დღეს ჩვენი ხელისუფლებისა და ხალხის ნატო-სკენ სწრაფვა საერთო ინტერესებში შედის,” – განაცხადა სესიაშვილმა.