საპენსიო სააგენტო საინვესტიციო საბჭოს წევრებს ეძებს და 9 სამუშაო დღეში 60 000 დოლარის გადახდას გეგმავს. ინფორმაცია სააგენტომ "Financial Times"-ში გამოაქვეყნა.

საბჭოს მომავალ წევრებს სახელმწიფო სრულად დაუფარავს სამგზავრო ხარჯებსაც. აპლიკაციის მიხედვით, არ იქნება აუცილებელი საინვესტიციო საბჭოს წევრები და მისი თავმჯდომარე საქართველოში მუდმივად იმყოფებოდნენ. საშუალოდ, წლის განმავლობაში შესრულებული სამუშაოს ჯამური რაოდენობა 72 საათია, ანუ 1 საათში საბჭოს წვერებს სააგენტო 833 დოლარს გადაუხდის.

პარლამენტის ფრაქცია ”ნაციონალური მოძრაობის” თავმჯდომარე რომან გოცირიძე ამბობს, რომ საპენსიო ფონდის ხელფასების გადახდა ხდება ხალხის ფულით.

„აი ამ საპენსიო ფონდის თავმჯდომარეს აქვს 15 000 ლარი ხელფასი და საბჭოს წევრებს, რომლებიც სამ თვეში ერთხელ მოვლენ ან შეიძლება არც მოვლენ, აგერ 5 000 ლარი დაუნიშნეს. რა ენაღვლებათ იმიტომ, რომ უნიშნავენ ხალხის ფულს, აბა საკუთარი ჯიბიდან დაუნიშნოს ივანიშვილმა, დავინახავთ, რომ 5 000 ლარი კი არა 50 ლარსაც არ დაუნიშნავს,“ - აღნიშნა რომან გოცირიძემ.

ზურაბ ჭიაბერაშვილი მოქალაქეების მხრიდან უსამართლობის განცდაზე საუბრობს და აღნიშნავს, რომ მთავრობამ მოქალაქეები აღნიშნულ საპენსიო სქემაში ძალდატანებით შეიყვანა.

„ჩვენ რომ წავსულიყავით ერთი სულ ნებაყოფლობით სისტემით და პლიუს იქ იმით, რომ ეს განთავსებულიყო კერძო საპენსიო ფონდებში, მაშინ ადამიანებს არ გაუჩნდებოდათ ეს უსამართლობის განცდა, რომ მე ჩემთვის რაღაცა უნდა დავაგროვო 2 ლარი და 12 ლარი და ამაში რომ ეს ფულიც არ დაიკარგოს, ვიღაცამ უნდა აიღოს 10 000-ობით ევრო და დოლარი. ეს უსამართლობის განცდა მოქალაქეებს უჩნდებათ სწორედ იმის გამო, რომ მთავრობამ ისინი ძალით და სავალდებულოდ შეიყვანა ამ სქემაში,“ - აცხადებს ზურაბ ჭიაბერაშვილი.