ნატო–ს გენერალური მდივანი იენს სტოლტენბერგი თბილისში სამუშაო ვიზიტით იმყოფება. იგი საქართველოს პრეზიდენტს სალომე ზურაბიშვილს შეხვდა. შეხვედრის დასრულების შემდეგ სალომე ზურაბიშვილმა განაცხადა, რომ მისი მთავარი გზავნილი ოკუპირებულ ტერიტორიებს უკავშირდებოდა. პრეზიდენტის თქმით, შეხვედრის დროს არჩევნებზე არ უსაუბრიათ და საუბარი მხოლოდ თავდაცვის თემებს შეეხო.

„არჩევნები სულ არ ყოფილა. აქ იყო ღია კარების პოლიტიკა და ის მიდგომა, რაც არის ნატო-სი, რომ რაც შეიძლება მეტი თანამშრომლობა იყოს ნატო-სთან. მაგრამ ჩემი მთავარი გზავნილი დღეს სწორედ იყო ოკუპირებული ტერიტორიების საკითხზე. რამეთუ ძალიან დამძიმდა ოკუპაციის ხაზთან, ყველა რუსეთის ქმედებები - ეს იქნება მცოცავი საზღვარი სხვადასხვა ადგილებზე, ეს იქნება გატაცებები თუ ეს იქნება ის მუქარები, რაც ისმოდა თუნდაც ბოლო პერიოდში, თუნდაც ნატო-ს წვრთნების შესახებ,“ - ამბობს სალომე ზურაბიშვილი.

პრეზიდენტმა ჟენევის მოლაპარაკებების ფორმატის ცვლილებაზე კიდევ ერთხელ ისაუბრა და აღნიშნა, რომ შეხვედრებმა პოლიტიკური დატვირთვა უნდა შეიძინოს.

„ჩვენ არ ვიცვლით ჩვენს სამშვიდობო გზავნილებს. სხვა პოლიტიკა საქართველოს არ გააჩნია. უნდა გააქტიურდეს ჟენევის ფორმატი, უნდა მიიღოს იმან პოლიტიკური დატვირთვა ან ჟენევაში ან სხვაგან,“ - განაცხადა სალომე ზურაბიშვილმა.