საინტერესო და ინოვაციური იდეაა... შესაძლოა, ელექტრონული კენჭისყრის მეთოდი ედპ-ის ყრილობაზე გამოვიყენოთ, რომელიც უახლოეს პერიოდში გაიმართება

საინტერესო და ინოვაციური იდეაა... შესაძლოა, ელექტრონული კენჭისყრის მეთოდი ედპ-ის ყრილობაზე გამოვიყენოთ, რომელიც უახლოეს პერიოდში გაიმართება - ბაჩუკი ქარდავა

პოლიტიკა - 20:32, 24 Mar, 2019

478

ნაციონალურმა მოძრაობამ დღევანდელ ყრილობაზე თავმჯდომარე და პოლიტიკური საბჭო ელექტრონული კენჭისყრით აირჩია. დელეგატებმა სმარტფონების საშუალებით და უნიკალური კოდის გამოყენებით შეძლეს სასურველი კანდიდატისთვის ხმა მიეცათ. კენჭისყრის ამგვარ მეთოდს მიესალმებიან როგორც ყრილობის მონაწილეები, ასევე დამსწრე პოლიტიკოსები და ექსპერტები.

ამ იდეას ინოვაციური უწოდა ედპ-ის თავმჯდომარემ ბაჩუკი ქარდავამ და აღნიშნა, რომ მისი საერთო ეროვნულ არჩევნებში გამოყენებისათვის პროექტს დახვეწა და მეტი დაცულობა დასჭირდება.

"ძალიან საინტერესო და ინოვაციური იდეაა, თუმცა, ამ საკითხს ჯერ კიდევ ბევრი მუშაობა დასჭირდება. უზრუნველყოფილი უნდა იყოს მისი დაცულობა როგორც გარე, ასევე შიდა ჩარევებისგან. იდეა და მიზანი არის სწორი. შესაძლოა, ფარული კენჭისყრის მსგავსი მეთოდი ჩვენ ეროვნულ-დემოკრატიული პარტიის მორიგ ყრილობაზე გამოვიყენოთ, რომელიც უახლოეს პერიოდში გაიმართება," - აცხადებს ბაჩუკი ქარდავა.

ექსპერტები ტექნიკურ მხარეზე და მის კიბერშეტევებისაგან დაცულობაზე ამახვილებენ ყურადღებას და ამბობენ, რომ ამ მეთოდს ჯერ კიდევ დასჭირდება განვითარება. მათი განცხადებით, რომ ეს არის კარგი სიახლე და უზრუნველყოფს ამომრჩევლის უფრო მარტივ ჩართულობას ხმის მიცემის დროს. ისინი აცხადებენ ასევე, რომ მნიშვნელოვანია თავად სერვერი და პროგრამული უზრუნველყოფა არ იქნას ვინმეს მიერ ბოროტად გამოყენებული, შედეგების მანიპულაციის მიზნით.