"ძალიან კარგი სამედიცინო დიაგნოზია, რომელიც ამერიკული პოლიტიკური ისტებლიშმენტის მოსაზრებას ასახავს რა ტიპის ე.წ. ხელისუფლება გვყავს საქართველოში"- ვაშაძე Fox News-ის სკანდალურ სტატიაზე

პოლიტიკა - 16:36, 22 Mar, 2019

1005

გაერთიანებული ოპოზიცია "ძალა ერთობაშიას" ლიდერი, გრიგოლ ვაშაძე გავლენიანი ამერიკული ტელეარხის Fox News-ის ონლაინ გამოცემის სკანდალურ სტატიას ეხმაურება, სადაც ნათქვამია - „ბიძინა ივანიშვილი, პრემიერ-მინისტრი პრორუსული პლატფორმით და რუსეთის სავარაუდო ჩარევით გახდა“.

ვაშაძე ამბობს, რომ სანამ აშშ-ის სამართალდამცავი ორგანოები არ იტყვიან შესაბამის სიტყვას, სტატიაზე განცხადებების გაკეთება უადგილოა, თუმცა ოპოზიციის ლიდერი იქვე აღნიშნავს, რომ გავლენიანი გამოცემა ბიძინა ივანიშვილს დიაგნოზს უვამს.

"სანამ ჩვენ არ ვნახავთ ამ ელექტრონულ შეტყობინებას და სანამ ამერიკის შეერთებული შტატების კანონმდებლობა არ იტყვის თავის სიტყვას, ჩვენი მხრიდან რაიმე კომენტარების გაკეთება სრულიად უადგილოდ გვეჩვენება, მაგრამ სტატიაში შესანიშნავი სამედიცინო დიაგნოზია დასმული, რაც შეეხება ამ ქვეყნის არაფორმალურ მმართველს, როდესაც ნათქვამია, პუტინთან დაახლოებული საქართველოში მცხოვრები ქართველი ოლიგარქი, ბიძინა ივანიშვილი, რომელიც რუსული მანდატით მიდიოდა ხელისუფლებაში, მიუხედავად 2008 წლის საქართველოს წინააღმდეგ გაჩაღებული ომისა, ერთი სიტყვა კრიტიკის არ დასცდენია რუსეთის ან პუტინის მიმართ. ეს არის ძალიან კარგი სამედიცინო დიაგნოზი რომელიც ძალიან კარგად ასახავს ამერიკული საზოგადოების, ამერიკული მედიისა და პოლიტიკური ისტებლიშმენტის მოსაზრებას იმაზე რა ტიპის ე.წ. ხელისუფლება გვყავს საქართველოში" - თქვა ვაშაძემ.