არასამთავრობო ორგანიზაციების წარმომადგენლები პარლამენტის თავმჯდომარის შემდეგ, იუსტიციის მინისტრმაც გააკრიტიკა. განცხადება თეა წულუკიანმა კონფერენციაზე გააკეთა, რომელსაც დიპლომატიური კორპუსის წარმომადგენლებიც ესწრებოდნენ.

თეა წულუკიანმა „2018 წლის საქართველოს პრეზიდენტის არჩევნები: მიღებული გამოცდილება და სამომავლო ნაბიჯები“- შესახებ მიმდინარე კონფერენციაზე განაცხადა, რომ სამოქალაქო საზოგადოება ქალ საპრეზიდენტო კანდიდატს გენდერული ნიშნით თავდასხმებისგან არ იცავდა.

მისი თქმით, ზოგიერთმა არასამთავრობო ორგანიზაციამ საპრეზიდენტო არჩევნებზე აჩვენა, რომ ისინი არ იყვნენ პოლიტიკურად ნეიტრალურები და არ მოსწონდათ ხელისუფლების მიერ მხარდაჭერილი საპრეზიდენტო კანდიდატი.

„არაერთ არასამთავრობო ორგანიზაციას მე პირადად მოვუწოდე, როგორც კომისიის თავმჯდომარემ რომ დაეგმოთ და ჩართულიყვნენ კამპანიაში, გენდერული ნიშნით კანდიდატზე თავდასხმის წინააღმდეგ. ბოიკოტის რეჟიმში მყოფმა რამდენიმე არასამთავრობო ორგანიზაციამ მიპასუხა, რომ ისინი თავად გადაწყვეტდნენ, ჩართულიყვნენ თუ არა ქალი კანდიდატის წინააღმდეგ გენდერული ნიშნით თავდასხმების აღსაკვეთად კამპანიაში. რეალურად მე ვთვლი, რომ მათ არაფერი, ან ძალიან ცოტა გააკეთეს იმისთვის, რომ ქალი კანდიდატი გენდერული თავდასხმებისგან დაეცვათ. მე მრჩებოდა შთაბეჭდილება, რომ ის რამდენიმე არასამთავრობო ორგანიზაცია, რომელიც ბოიკოტს უცხადებდა, იმიტომ რომ როგორ აკადრეს და მტკიცებულება მოსთხოვეს, უწყებათაშორის კომისიას, მათ არ მოსწონდათ პოლიტიკურად ქალბატონი სალომე და მას არ იცავდნენ ან არასათანადოდ აკვირდებოდნენ საარჩევნო პროცესს, შესაბამისად მათ აკლდათ ნეიტრალიტეტი და მათ აკლდათ პროფესიონალიზმი.“- განაცხდა თეა წულუკიანმა.