საოკუპაციო ხაზთან დაფიქსირებულ ინციდენტებს ერგნეთის შეხვედრაზე განიხილავენ

პოლიტიკა - 11:49, 22 Mar, 2019

760

ამ წუთებში, გორის მუნიციპალიტეტის სოფელ ერგნეთში ინციდენტების, პრევენციების და მათზე რეაგირების მექანიზმის სამუშაო ჯგუფის რიგით 92-ე შეხვედრა მიმდინარეობს. „ნიუპოსტის“ კორესპონდნეტის ცნობით, მთავარ განსახილველ თემებს შორის არჩილ ტატუნაშვილის და დავით ბაშარულის გარდაცვალების საკითხებთან ერთად, გასული თვის განმავლობაში დაფიქსირებული ინციდნეტებია: გატაცებები, უკანონო ბორდერიზაცია და მოსახლეობისთვის შექმნილი სხვა დამატებითი ბარიერები.
საქართველოს ხელისუფლებას წარმოადგენს სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილე ირაკლი ანთიძე, რომელმაც შეხვედრის დასრულებამდე განაცხადა, რომ დააყენებენ მოსახლეობისთვის შექმნილი ბარიერების მოხსნის საკითხს. საუბარია იმ სოფლების მოსახლეობაზე, სადაც ადგილობრივებს საქართველოს ხელისუფლების კონტროლირებად ტერიტორიაზეც არ ეძლევათ სრულად გადაადგილების საშუალება.
ირაკლი ანთიძის ინფორმაციით, ბოლო შეხვედრიდან დღემდე, საოკუპაციო ძალების წარმომადგენლებმა ე.წ. საზღვრის გადაკვეთის ბრალდებით საქართველოს 11 მოქალაქე დააკავეს, მათგან 2 ამ დრომდე ცხინვალის იზოლატორში რჩება.