არასამთავრობო ორგანიზაცია წამების მსხვერპლთა რეაბილიტაციის ცენტრი „ემპათია“ რუსეთის სამხედრო ბაზაზე ირაკლი კვარაცხელიას საეჭვო ვითარებაში დაღუპვასთან დაკავშირებით სტრასბურგის სასამართლოს მიმართავს.

"ირაკლი კვარაცხელიას რუსეთის სამხედრო ბაზაზე საეჭვო ვითარებაში გარდაცვალება, მიმართვა ევროსაბჭოს წამების პრევენციის კომიტეტს და ჟენევის დისკუსიათა ფორმატის პრიორიტეტები

2019 წლის 13 მარტიდან ცენტრმა „ემპათიამ“ დაიწყო ირაკლი კვარაცხელიას სამართლებრივი დაცვა, სამართლებრივი და საექსპერტო დეპარტამენტების ერთობლივი ჩართულობით.

ცენტრი „ემპათია“ გააცნობს საზოაგადოებას სტრატეგიას ირაკლი კვარაცხელიას ინტერესების დაცვასთან დაკავშირებით ადგილობრივ და საერთაშორისო დონეზე. ირაკლი კვარაცხელიას საქმის ადვოკატები საზოგადოებას გააცნობენ იმ მიმართულებებს, რომლითაც საქმის განხილვა უნდა დაიწყოს სტრასბურგის ადამიანის უფლებათა სასამართლოში. ასევე ცენტრი „ემპათია“ მიმართავენ საქართველოს მთავრობას მოახდინოს დაუყოვნებლივი რეაგირება შემდეგ საკითხებზე:

1. გალის რაიონში მდებარე საოკუპაციო სამხედრო ბაზის პასუხისმგებელი პირების იდენტიფიცირება და მათ პასუხისმგებლობაში მიცემა, ადამიანთა უკანონო დატყვევების ფაქტებთან დაკავშირებით, რომელიც არსებული ინფორმაციით არაერთია და არ ეხება მხოლოდ ირაკლი კვარაცხელიას საქმეს.

2. აღნიშნული ხელმძღვანელი პირების ოთხმოზორია - ტატუნაშვილის სიაში შეყვანის ინიცირება

3. ასევე ცენტრი „ემპათია“ მიიჩნევს, რომ, ზოგადად, სამოქალაქო პირების დატყვევება ოკუპირებულ ტერიტორიებზე, განსაკუთრებით კი რუსეთის სამხედრო ნაწილების იზოლატორებში, არაადამიანურ პირობებში, უხეშად არღვევს საერთაშორისო ჰუმანიტარული სამართლის პირინციპებს, რაზედაც საგანგებო ვიზიტის მოთხოვნით, ცენტრი „ემპათია“ მიმართავს ევროსაბჭოს წამების პრევენციის კომიტეტს.

4. აღნიშნულის გათვალისწინებით, მოვითხოვთ, რომ ჟენევის დისკუსიათა ფორმატში, ასევე ყველა საერთაშორისო ფორმატში წინა პლანზე იქნას წამოწეული ამგვარი ქმედების აკრძალვის მოთხოვნა" - აღნიშნულია "ემპათიას" მიერ გავრცელებულ ინფორმაციაში.