თეა წულუკიანის თქმით, დემოკრატიულ ქვეყნების შესაბამისად ხელისუფლება საქართველშიც შეიცვლება, თუმცა ის ხელისუფლებიდან წასვლის შემდეგ ქვეყნიდან წასვლას არ აპირებს. ეს განცხადება წულუკიანმა ენმ-ს მხრიდან გაკეთებული კრიტიკული განცხადებების საპასუხოდ გააკეთა. მან ასევე მიმართა „ევროპული საქართველოს“ ლიდერს გიგა ბოკერიასაც და განაცხადა, რომ ნუ ეწყინება თუ ზოგჯერ მას პოლიტიკურ დებატებში მოუგებს:

„ერთ მშვენიერ დღეს ხელისუფლება შეიცვლება, იმიტომ რომ ამ ქვეყანაში ჩვენ მოვიტანეთ დემოკრატია, რომლის თანახმადაც მთავრობები მოდიან და მიდიან. მაგრამ ეს არ ნიშნავს იმას, რომ თქვენ რომ წახვალთ თქვენ მოხვალთ. იშრომეთ ამისთვის, ხალხს არ აქვს მოკლე მეხსიერება, ერთ დღეს ჩვენ წავალთ, მაგრამ ჩვენ რომ წავალთ ქართული ოცნების ყველა დეპუტატმა ვინც აქ ზის, თითოეულმა აქტივმა იციან, რომ ხელისუფლება რომ შეიცვლება იმ დილით მე ჩემოდანს კი არ ჩავალაგებ და კი არ მოვცოცხავ, არამედ მათ გვერდით ვიქნები. აი ეს არის სწორედ გენდერული თანასწორობა, სიმამაცე, მათ შორის პოლიტიკური, რომელიც თქვენ არ გაგაჩნიათ. მე თქვენ ყოველთვის მოგყვებით პოლიტიკურ დებატში ბატონო გიგა და მე მოველი, რომ არ გეწყინებათ, თუ დებატია დებატი იყოს, ხანდახან მოგიგებთ კიდეც ხოლმე. ნახვამდის, გემშვიდობებით.“- განაცხადა წულუკიანმა.