თბილისის მერმა ორ თვეში 73 მილიონი გაფლანგა - ოპოზიცია კალაძეს ბრალს სდებს

პოლიტიკა - 10:23, 21 Mar, 2019

931

ოპოზიცია თბილისის მერს ორ თვეში 73 მილიონი ლარის გაფლანგვაში ადანაშაულებს. ლევან ხაბეიშვილი ამბობს, რომ თანხა თბილისის მერიამ სამშენებლო სამუშაოებისთვის სხვადასახვა კომპანიას გადაურიცხა. კომპანიებში არიან „ქართული ოცნების“ შემომწირველები და ის ფირმები, ვინც პარტიულ აქტივობებს აფინანსებენ. იყო თუ არა თანხა არამიზნობრივად დახარჯული - საკითხის გასარკვევად ოპოზიციური პარტია პროკურატურას მიმართავს.

"ეს კომპანიებია "ჯეოგრუპი" "ენსისი" "ინსი" და "ანაგი," რომლებიც პირდაპირ დაკავშირებული არიან ქართულ ოცნებასთან. პარტიულ აქტივობებს აფინანსებენ პირდაპირ ბიუჯეტის ხარჯზე, 2018 წელს რომ გაამარჯვებინეს და ფული შესწირეს, ბიძინა ივანიშვილის ხეებს რომ დაატარებენ და ქართულ ოცნებასთან დაახლოებულ პირებს რომ სახლებს უშენებენ, ამ კომპანიებს ათობით მილიონ ლარს უხდის კახი კალაძე,"-აცხადებს ლევან ხაბეიშვილი.

ბრალდებას და კომპანიების "ქართულ ოცნებასთან" კავშირს უარყოფენ მერიაში.

"როდესაც ადამიანი გამოდის და ამხელა გრანდიოზულ ზღაპრებს იგონებს, მინიმუმ ტენდერებში მაინც უნდა იყოს შესული გადამოწმებული უნდა ჰქონდეს და მინიმუმ 1 უმნიშვნელო სახის დარღვევას მაინც უნდა გვეუბნებოდეს,"-აცხადებს თბილისის მერის მოადგილე, ირაკლი ბენდელიანი.