ანაკლიის პროექტი და მასთან დაკავშირებული შესაძლო რუსეთის ინტერესები - ოპოზიზია მაია ცქიტიშვილისგან განმარტებებს ითხოვს

პოლიტიკა - 09:50, 21 Mar, 2019

816

პარლამენტში დღეს რეგიონული განვითარებისა და ინფრასტრუქტურის მინისტრი მაია ცქიტიშვილი მივა.

ცნობილია, რომ მინისტრი ყურადღებას ანაკლიის პორტის მშენებლობის პროექტთან დაკავშირებით გაამახვილებს.

ოპოზიცია ანაკლიის პორტთან დაკავშირებით რუსულ ინტერესზე ამახვილებს ყურადღებას და კითხვების დასმას მინისტრისთვის ამ კუთხით აპირებს.

"რა ალტერნატიულ ინვესტორებზე არის საუბარი, როდესაც საუბრობენ იმაზე, რომ ეს პროექტი განხორციელდება, მაგრამ სხვა ინვესტიციების გზით, იმიტომ რომ მე პირადად ეჭვი მაქვს, რომ ამ ინვესტორების უკან იდგება რუსული ინტერესები,"-აცხადებს სალომე სამადაშვილი.

"ევროპულ საქართველოში" ხელისუფლების მხრიდან პროექტის ჩაშლის სურვილზე ამახვილებენ ყურადღებას.

"სახელმწიფოს ნაცვლად იმისა, რომ ერთობლივად გამოხატულიყო ინტერესი ამ პროექტის განხორციელების, მიმართულია ამ პროექტის ხელის შესაშლელად, ამის უამრავი მტკიცებულება არსებობს,"-აცხადებს ოთარ კახიძე.

ეკა ბესელიას თქმით, ძალიან მნიშვნელოვანია მინისტრმა ყველა კითხვას სრულფასოვნად გასცეს პასუხი.

"ბოლო პერიოდში განვითარებული მოვლენების ფონზე, როდესაც გარკვეული კითხვის ნიშნები გაჩნდა, არის ეს ერთგვარი პირდაპირი თუ არა ირიბი ბმა თიბისი ბანკთან დაკავშირებულ საქმესთან დაკავშირებით, აქ მაინც კითხვებმა უნდა ამოწუროს და პასუხებმაც ნათელჰყოს, ხომ არ დგას რაიმე კითხვის ნიშანი ამ პროექტის განხორციელების ტემპს ან ვაების ან მისი შედეგის თვალსაზრისით,"-აცხადებს ეკა ბესელია.

კითხვები ექნებათ უმრავლესობის წევრებსაც.

"ჩვენ გვექნება კითხვები ვადებთან დაკავშირებით, გვექნება კითხვები მოზიდულ ინვესტიციებთან დაკავშირებით, გვექნება კითხვები ტვირთბრუნვებთანდაკავშირებით,"-აცხადებს არჩილ თალაკვაძე.