„ზურაბიშვილის განცხადებები ჩვენი სახელმწიფოსთვის საფრთხეა“ - ოპოზიცია პრეზიდენტის იმპიჩმენტზე ალაპარაკდა

პოლიტიკა - 12:49, 20 Mar, 2019

1006

"ნაციონალური მოძრაობის" ერთ-ერთი ლიდერი სალომე სამადაშვილი ამბობს, რომ საქართველოს პრეზიდენტის ომის შსახებ გაკეთებულ განცხადებებს რუსეთი საქართველოს წინააღმდეგ გამოიყენებს, რადგან დეპუტატის შეფასებით, პრეზიდენტის რანგში გაკეთებული განცხადება, რომ მიხელ სააკაშვილმა ცხინვალი და მოსახლეობა დაბომბა, მხოლოდ რუსეთის ინტერესებზე ასხამს წყალს.

სამადაშვილი ამბობს, რომ რუსეთის ინტერესებშია ჟენევის ფორმატის გაუქმებაც. სწორედ ამ ფორმატის გადახედვის აუცილებლობაზე ისაუბრა პრეზიდენტმა რამდენიმე დღის წინ.

"საქართველოს უკვე პრეზიდენტის განცხადება, რომ ერთის მხრივ, ქართულმა მხარემ დაბომბა მძინარე ცხინვალი და მეორეს მხრივ, განცხადება იმის თაობაზე, რომ ჟენევის მოლაპარაკებები ვერ ასრულებს თავის ფუნქციას, შეიძლება, საერთოდ, მოითხოვოს 2008 წლის ცეცხლის შეწყვეტის შესახებ ხელშეკრულებით შექმნილი საერთაშორისო მოლაპარაკებების, საერთაშორისო უსაფრთხოების მექანიზმების გადახედვის შესაძლებლობა.

ეს შესაძლებლობა შეიძლება, გამოიყენოს რუსეთმა ჩვენი სახელმწიფო ინტერესების წინააღმდეგ და მე ვფიქრობ, რომ ქალბატონ ზურაბიშვილის განცხადება, უკვე პრეზიდენტის რანგში, ატარებს ჩვენი სახელმწიფოსთვის ისეთ საფრთხეს, რომ დროა, ჩვენ დავიწყოთ მსჯელობა სამართლებრივ პასუხისმგებლობაზე პრეზიდენტის განცხადებასთან დაკავშირებით.

მე ვფიქრობ და არ მაქვს იმედი, რა თქმა უნდა, იმედი, რომ დღევანდელ პოლიტიკურ ვითარებაში იქნება შესაძლებელი სალომე ზურაბიშვილის განცხადების საფუძველზე იმპიჩმენტის პროცედურის დაწყება, მაგრამ მომავალში, როცა პოლიტიკური სიტუაცია იქნება შესაძლებელი, ვფიქრობ, ის საკუთარი განცხადებებით საფუძველს აძლევს სწორედ იმპიჩმენტის პროცედურების დაწყებას,“-განაცხადა სალომე სამადაშვილმა.