რუსეთთან დიალოგის ახალი ფორმატი - ოპოზიცია ზურაბიშვილის ინიციატივას მავნებლურს უწოდებს და რუსეთის ინტერესებზე საუბრობს

პოლიტიკა - 10:00, 20 Mar, 2019

1440

საქართველოს პრეზიდენტის ინიციატივას რუსეთთან დიალოგის ახალი ფორმატის შექმნასთან დაკავშირებით, ოპოზიცია მიუღებლად მიიჩნევს, მათი თქმით ჟენევის ფორმატის კრიტიკა და სხვა ფორმატის შექმნა რუსეთის ინტერესებში შედის და ნებისმიერი მსგავსი განცხადება მავნებლობაა ქვეყნის წინააღმდეგ.

"მსგავსი განცხადებები საქართველოს პრეზიდენტის მხრიდან, როდესაც არ არსებობს არანაირი ალტერნატიული საერთაშორისო ფორუმი, რომელშიც ჩვენ რუსეთთან შეგვიძლია მოლაპარაკებების წარმოება ჩვენი დასავლელი პარტნიორების თანამონაწილეობით, ეს შედის მხოლოდ და მხოლოდ რუსეთის ინტერესებში და პირდაპირ ეწინააღმდეგება ჩვენს სახელმწიფოებრივ ინტერესებს."- განაცხადა სალომე სამადაშვილმა.

"ევროპულ საქართველოში" ზურაბიშვილის განცხადებას "არაადეკვატურს" უწოდებენ და ამბობენ, რომ პრეზიდენტი ამ ნაბიჯით, ჟენევის ფორმატს თავს დაესხა.

"უკანონოდ გაპრეზიდენტებულმა სალომე ზურაბიშვილმა უკვე დაიწყო არაადეკვატური განცხადებების გაკეთება. პირველ რიგში ის თავს დაესხა ჟენევის ფორმატს. ნებისმიერი განცხადება, რომელიც მნიშვნელობას უკარგავს ჟენევის ფორმატს, ანუ იმ ფორმატს, სადაც საქართველო მოკავშირეებთან ერთად არის წარმოდგენილი, არის პირდაპირ მავნებლობა,"-განაცხადა ოთო კახიძემ.