"დღეს ეროვნული ბანკი მთავრობისა და არაფორმალური მმართველის მიერ იმართება"

"დღეს ეროვნული ბანკი მთავრობისა და არაფორმალური მმართველის მიერ იმართება" - რომან გოცირიძე

პოლიტიკა - 13:47, 19 Mar, 2019

911

ფრაქცია "ნაციონალური მოძრაობოს" ლიდერი, რომან გოცირიძე აღნიშნავს, რომ დღეს ეროვნული ბანკი მთავრობისა და არაფორმალური მმართველის მიერ იმართება. განცხადება მან პარლამენტში გააკეთა.
"ქალბატონმა სალომე ზურაბიშვილმა ახლახანს განაცხადა, რომ ის ესაუბრა ბიძინა ივანიშვილს, რომელმაც უთხრა, რომ ის თურმე დღეიდან თავისუფალია, არ გაქვს ჩვენი ვალი და იმოქმედე დამოუკიდებლადო. მაგრამ სინამდვილეში ვითარება არის სხვანაირად. პრეზიდენტს აქვს ვალდებულება წარადგინოს ეროვნული ბანკის საბჭოს ორი წევრი. ამ ორ წევრს ვადა გასდის აპრილის ბოლოს. ეს არის მეტად მნიშვნელოვანი საკითხი, ვინაიდან დღეს ეროვნული ბანკი იმართება მთავრობისა და არაფორმალური მმართველის მიერ, რომელთა გადაწყვეტილებებიც ძალიან მძიმედ აისახა ჩვენს ყოველდღიურობაზე და განსაკუთრებით ხაზგასასმელია ის, რაც დაკავშირებულია „თიბისი ბანკთან“ და ანაკლიის პროექტთან. ამიტომ, ორი წევრის წარდგენის ეს ექსკლუზიური უფლება ფაქტობრივად, ჩამოართვეს პრეზიდენტს. დღეს უკვე მას თავს ახვევენ წარმოადგინოს ორი ადამიანი, ტრადიციულად, როგორც იციან ხოლმე „ჯიდიესგავლილი“, 20/30-ის ინკუბატორით გამოჩეკილი ჩვეულებრივი მორიგი მორჩილი მარიონეტები. ზოგიერთი კანდიდატურის გვარი და სახელიც ვიცით ჩვენ. ფაქტობრივად, პრეზიდენტი იზოლირებულია ამ პროცესისგან და ისეთი ადამიანების კანდიდატურები განიხილება, რომლებიც ვერც თავისი კომპეტენციით და ვერც სხვა თვისებებით, ვერ უზრუნველყოფენ იმ ფუნქციის შესრულებას, რაც ეროვნული ბანკის საბჭოს აკისრია.
იმასაც თუ გავიხსენებთ, რომ რამდენიმე თვის წინ ეროვნული ბანკის ყველაზე მნიშვნელოვანი პოსტი დაიკავა ასევე „20/30“-ის ინკუბატორიდან წამოსულმა კადრმა და დღეს ის არის ეროვნული ბანკის გენერალური დირექტორი. ფაქტობრივად, ეროვნულ ბანკში პრეზიდენტისა და ვიცე-პრეზიდენტების შემდეგ ყველაზე მაღალი თანამდებობაა. ამ 20/30-მა შეაღწია ეროვნულ ბანკშიც. ყველგან არიან მოდებული საცეცებივით, პარლამენტშიც, მთავრობაშიც, მერიაშიც, სადაც გაიხედავ ასეთი პრინციპით შერჩეული ადამიანები მოიყვანეს ხელისუფლებაში. კასტინგის უკვე მეორე ეტაპი დაიწყო და „ქართული ოცნება“ ეძებს კადრებს, რომელსაც თურმე სოზარ სუბარი არჩევს კანცელარიაში. ამიტომ, მოვუწოდებ სალომე ზურაბიშვილს, ძალადობრივი და არჩევნების გაყალბებით გზით მოსულ პრეზიდენტს, ნუ დაემორჩილება იმ ზეწოლას, რომლის ქვეშაც იმყოფება და შეასრულოს თავისი კონსტიტუციური მოვალეობა. შევეშვათ იმ ორგანოების უზურპირებას, რომელიც კონსტიტუციურად მოწოდებულია, რომ იყოს თავისუფალი“, - განაცხადა გოცირიძემ.