"2-3 წლის განმავლობაში ერთად ისხდნენ, გრძნობდა ამ სუნს და გვიმალავდა, რომ კორუფციაშია გარეული ბესელია?!“ -უსუფაშვილი

პოლიტიკა - 12:05, 19 Mar, 2019

1274

“ქართული ოცნების“ მოქმედ და ყოფილ წევრებს შორის არსებულ დაპირისპირებას, პარლამენტის ყოფილი თავმჯდომარე, „შენების მოძრაობის“ ლიდერი დავით უსუფაშვილი გამოეხმაურა. კორუფციასთან დაკავშირებით ბესელია-ზარდიაშვილის ურთიერთბრალდებებს უსუფაშვილი მძიმე მორალურ მდგომარეობად აფასებს, მისი თქმით, თუ თანაგუნდელებს კორუფციაზე ინფორმაცია ქონდათ, აქამდე არ უნდა დაემალათ.

"2-3 წლის განმავლობაში ერთად ისხდნენ, გრძნობდა ამ სუნს და გვიმალავდა ის ვიღაცა, რომელმაც თურმე იცის, რომ კორუფციაშია გარეული ბესელია?! თუ ამ დონის ბრალდება აქვს, ეს იცის და დღეს გველაპარაკება... სამი წელი ჩუმად იყო?! დღეს მე შემომჩივის ხელისუფლება, მმართველი გუნდი - აგერ გვერდზე რომ მიზის, ამას კორუფციაში ხელები აქვს გასვრილიო. მე და თქვენ გვეუბნება ის, რომელსაც პროკურატურა ამისთვის ჰყავს. რაში ჯდება ეს ყველაფერი, სად მიჰყავთ ქვეყანა, ზნეობა, მორალი. ამ პროცესში ვეპატიჟებით ჩვენ იმ ახალ სახეებს?! მორალური კლიმატი როცა ასეთია, როგორ შეიძლება გადაწყვიტოს ადამიანმა, რომ მე მივალ და დავუდგები გვერდით ჩემს უკვე გამობრძმედილ კოლეგას, რომელიც მათ, გუშინწინ რომ ერთად ისხდნენ და გადაწყვეტილებებს იღებდნენ, დღეს კორუფციაში გასვრილს ეძახის. ამაში ეპატიჟებიან წესიერ ხალხს?! “ - აცხადებს დავით უსუფაშვილი.