„სესიაშვილი მართლმადიდებლურ ეკლესიას და მართლმადიდებლებს შეურაცხყოფას აყენებს“

პოლიტიკა - 10:26, 19 Mar, 2019

1250

პარლამენტის თავდაცვისა და უშიშროების კომიტეტის თავმჯდომარის ინიციატივა სავალდებულო სამხედრო სამსახურის შესახებ დღეს ბიუროს სხდომაზე დარეგისტრირდება.

პროექტით უქმდება კანონის ის ნორმა, რომლის მიხედვითაც მღვდელთმსახურები ან სასულიერო სასწავლებელში მყოფი პირები სამხედრო სავალდებულო სამსახურის გადავადების უფლებით სარგებლობენ. ცვლილება არ ეხება მართლმადიდებელ სასულიერო პირებს.

„ჩემი კანონპროექტი დისკრიმინაციული არ არის. უქმდება ყველასთვის ის შეღავათი, რაც გულისხმობს მღვდელმსახურებისთვის სამხედრო სავალდებულო სამსახურიდან გადავადებას. ჩემი პროექტით ეს ყველასთვის უქმდება.

თუ სხვა ნორმაში, მართლმადიდებელი მღვდელმსახურებისთვის არსებობს რაიმე შეღავათი, ეს არის სხვა საკითხი. მე თუ მკითხავთ, ჩემთვის მნიშვნელოვანია, რომ ყველა დაექვემდებაროს ერთნაირ რეგულაციას,“-განაცხადა ირაკლი სესიაშვილმა.

ირაკლი სესიაშვილის ინიციატივას არაკონსტიტუციურს უწოდებენ ოპოზიციაში. „ნაციონალურ მოძრაობაში" აცხადებენ, რომ სესიაშვილის ინიციატივას, შეურაცხმყოფელია.

„სესიაშვილს, როგორც ჩანს, საერთოდ არ ესმის, რომ ამითი შეურაცხყოფას აყენებს მართლმადიდებლურ ეკლესიას და მართლმადიდებლებს. იმიტომ, რომ რა გამოდის - წმიდათა წმიდა ვალი სამშობლოს დაცვის, მართლმადიდებლებს არ უნდა შეეხოთ მარტო და სხვა კონფესიის წარმომადგენლებს უნდა შეეხოთ. ეს რას ნიშნავს? მართლმადიდებლები ამ პროცესიდან გამორთული უნდა იყვნენ,“-აცხადებს გიორგი ბარამიძე.

„ევროპულ საქართველოში“ ვითარების მოსაწესრიგებლად ხელისუფლებას, პროფესიულ საკონტრაქტო საჯარისო სამსახურზე გადასვლას სთავაზობენ.

„აშკარად არაკონსტიტუციურ ინიციატივას გვთავაზობს „ქართული ოცნება“, ვთვლით, რომ ეს არის მიუღებელი და დაუშვებელი. ყველა რელიგიური გაერთიანება და კონფესია უნდა იყოს თანაბარი კანონის წინაშე და ეს პრინციპი უნდა დაიცვას სახელმწიფომ. ხოლო რაც შეეხება სამხედრო სავალდებულო სამსახურს, აქ გამოსავალი არის პროფესიულ საკონტრაქტო საჯარისო სამსახურზე გადასვლა სრული მოცულობით,“-ამბობს ოთარ კახიძე.