საპარლამენტო უმრავლესობა მოსამართლეების შერჩევის კრიტერიუმებთან დაკავშირებით ხვალინდელ კენჭისყრაზე საპარლამენტო უმრავლესობის მეირ ინიცირებულ კანონპროექტს მხარს დაუჭერს - ამის შესახებ ჟურნალისტებს უმრავლესობის ლიდერმა, არჩილ თალაკვაძემ საპარლამენტო უმრავლესობის სხდომის დასრულების შემდეგ განუცხადა.

თალაკვაძის თქმით, აზრთა სხვადასხვაობა გუნდში ამ საკითხთან დაკავშირებით არ არსებობს და გადაწყვეტილებაში გუნდი ერთსულოვანი იქნება.

„ჩვენ ამ კანონპროექტს აუცილებლად მივიღებთ, ვინაიდან მასში ყველა ის პრინციპი, რა მოთხოვნებიც ჰქონდა საზოგადოებას, როგორც მონაწილეობასთან, ისე სიის ფორმირებასთან, შემდგომში პარლამნეტში განხილვასა და კენჭისყრასთან დაკავშირებით, გათვალისწინებულია“, – განაცხადა არჩილ თალაკვაძემ სხდომის დასრულების შემდეგ.

საქართველოს პარლამენტის იურიდიულ საკითხთა კომიტეტზე უზენაესი სასამართლოს მოსამართლეთა შერჩევის შესახებ საპარლამენტო უმრავლესობის მიერ მომზადებული კანონპროექტი დღეს პირველი მოსმენით განიხილეს და მხარი დაუჭირეს

კანონპროექტის თანახმად, უზენაესი სასამართლოს მოსამართლის ვაკანტურ ადგილზე განაცხადის შეტანა შეეძლება ყველა კვალიფიციურ იურისტს, ხოლო იმ შემთხვევაში, თუ კანდიდატი იუსტიციის უმაღლესი საბჭოს წევრი იქნება, საკუთარ კანდიდატურას მხარს ვერ დაუჭერს. მას შემდეგ კი, რაც საბჭო შერჩეული კანდიდატების სიას პარლამენტს გადაუგზავნის, დეპუტატები მათ ინდივიდუალურ რეჟიმში გაესაუბრებიან.