„ნაციონალური მოძრაობის“ ცენტრალურ ოფისში პოლიტსაბჭოს სხდომა მიმდინარეობს. სხდომაზე სავარაუდოდ, პარტიის თავმჯდომარედ გრიგოლ ვაშაძეს აირჩევენ.

„ნაციონალური მოძრაობის“ ერთ-ერთმა ლიდერმა, ზაალ უდუმაშვილმა პარტიის პოლიტსაბჭოს სხდომის დაწყებამდე განაცხადა, რომ გრიგოლ ვაშაძის კანდიდატურასთან დაკავშირებით არ იქნება აზრთა სხვადასხვაობა, რადგან მან საკუთარი ავტორიტეტითა და ბრძოლით დაამტკიცა, რომ არის ამ პარტიის ერთ-ერთი გამორჩეული ლიდერი, შესაბამისად ეს გადაწყვეტილება იყო ერთსულოვანი.

„სწორედ მიხეილ სააკაშვილის ინიციატივა იყო, თქვენ მოისმინეთ, რომ პარტიის თავმჯდომარე გრიგოლ ვაშაძე გამხდარიყო. ეს უკავშირდება ერთადერთ რამეს, რომ პარტია უნდა გახდეს უფრო ქმედით უნარიანი, უფრო მოქნილი. გადაწყვეტილება უნდა მიიღებოდეს ადგილზე. შესაბამისად, ეს სტრუქტურული ცვლილებები ემსახურება მხოლოდ და მხოლოდ იმას, რომ პარტია კიდევ უფრო გაძლიერდეს“, - განაცხადა უდუმაშვილმა.