საქართველოს ატლანტიკური საბჭოს ვიცე-პრეზიდენტი ბათუ ქუთელია სამხედრო სამსახურთან დაკავშირებით ირაკლი სესიაშვილის საკანონმდებლო ინიციატივას ეხმაურება. სესიაშვილის ინიციტივით, სამხედრო სავალდებულო სამსახურის გადავადების უფლებით ისარგებლებენ მხოლოდ მართლმადიდებელი მღვდელმსახურები ან სასულიერო სასწავლებლის სტუდენტები. რაც იმას ნიშნავს, რომ სხვა აღმსარებლობის მოქალაქეებს, რომლებიც სასულიერო საქმიანობას ეწევიან სავალდებულო სამსახურის გადავადების უფლება შეეზღუდებათ.

ექსპერტი აღნიშნულ ინიციატივას სახელმწიფოს დემოკრატიული მართვის პრინციპებისთვის დამაზიანებლად მიიჩბნევს და აცხადებს, რომ მსგავსმა მიდგომამ შესაძლოა საფრთხე შეუქმნას ქვეყნის ეროვნულ ინტერესებს:

„კანონპროექტი, რომელიც პარლამენტის თავდაცვის და უსაფრთხოების კომიტეტის თვმჯდომარემ წარადგინა, რბილად რომ ვთქვათ, მარტივ შეფასებას იმსახურებს და ეს არის სამარცხვინო ინიციატივა. უფრო სიღრმისეულად, ეს აზიანებს ზოგადად სახელმწიფოს დემოკრატიული მართვის პრინციპებს. აზიანებს იმ მთავარ ინსტიტუტს, რომელიც ქვეყნის თავდაცვისთვის უმნიშვნელოვანესია, ვგულისხმობ შეიარაღებულ ძალებს, უფრო შორს მიმავალ პრესპექტივაში თუ შევხედავთ ძალიან დიდ ზიანს აყენებს ჩვენი ქვეყნის ეროვნულ ინტერესებს, მეტ შეფასებას ამ ინიციატივაზე არ გავაკეთებ.“- განაცხადა ბათუ ქუთელიამ.