საქართველოს პარლამენტის იურიდიულ საკითხთა კომიტეტის სხდომაზე სამოქალაქო საზოგადოებამ პროტესტი კვლავ მაისურებით გამოთქვა, რომელზეც არის წარწერა - „კლანი უნდა წავიდეს“.

აღნიშნული პერფორმანსით მესამე სექტორის წარმომადგენლები საპარლამენტო უმრავლესობის კანონპროექტს აკრიტიკებენ, რომელიც უზენაეს სასამართლოში მოსამართლეთა გამწესების საკითხს ეხება.

მათი თქმით, არ აქვს მნიშვნელობა, რომელ კანონპროექტს დაუჭერენ მხარს დეპუტატები, რადგან სასამართლო სისტემაში რეალური ცვლილებები მხოლოდ იმ შემთხვევაში მოხდება თუ კლანური მმართველობა დასრულდება.

მათი თქმით, მმართველი გუნდის მიერ მომზადებული კანონპროექტის მიხედვით, კონკურსში მონაწილეობას ვერ მიიღებს ვერც ერთი ყოფილი მოსამართლე, თუ მას საკვალიფიკაციო ტესტირება არ აქვს გავლილი.

„თავად ეს გამოცდები მოსამართლის, მისი ჩატარება, არის იუსტიციის უმაღლესი საბჭოს იმ კლანის ხელში, რომელის ინტერესებსაც სწორედ არ წარმოადგენს იმგვარი ადამიანებისგან უზენაესი სასამართლოს დაკომპლექტება, რომლებიც არიან მათი ინტერესების მიღმა,“-აცხადებს დავით ჯანდიერი.

ახალგაზრდა იურისტთა ასოციაციის თავმჯდომარე სულხან სალაძე ამბობს, რომ აღნიშნული გამოცდების ჩასაბარებლად მოსამართლეობის მსურველ პირებს ძალიან ცოტა დრო ეძლევათ.

„ის გარემოება, რომ პრაქტიკულად ვერავინ იქნება იზენაესი სასამართლოს მოსამართლეობის კანდიდატი, თუ მას არ აქვს ჩაბარებული საკვალიფიკაციო გამოცდები და ამ გამოცდებისთვის რეალურად არაგონივრულად მცირე დროს სთავაზობს დაინტერესებულ პირებს. მეორე ის, რომ გადაწყვეტილების მიღებისათვის 2/3-2/3 პრინციპის ნაცვლად საუბარია ერთ 2/3-იან პრინციპზე, ეს არის სწორედ ის ინტერესი, რომელიც გააჩნია სასამართლოში არსებულ გავლენიან ჯგუფს. ყველგან, სანამ ეს კანონპროექტები განხილვაში იქნება, როგორც პარლამენტში, ასევე პარლამენტის გარეთ, ვფიქრობ, რომ აუცილებელია ხელისუფლებას შევახსენოთ, რომ კლანის ადგილი სასამართლო სისტემაში არ არის და კლანი აუცილებლად უნდა წავიდეს“, - განაცხადა სალაძემ.