"თუ ხელისუფლება არ დათანხმდება, მოკავშირეებს ექნებათ კიდევ ერთი არგუმენტი, რომ დარწმუნდნენ, საქართველოში ჩამოყალიბდა ავტორიტარული რეჟიმი"- ვაშაძე პროპროციულ საარჩევნო სისტემაზე

პოლიტიკა - 13:22, 18 Mar, 2019

1193

„ერთიანი ნაციონალური მოძრაობის“ ერთ-ერთი ლიდერი გრიგოლ ვაშაძე, პროპორციული საარჩევნო სისტემაზე გადასვლის მოთხოვნით, ხელმოწერების შეგროვების პროცესს გამოეხმაურა. ვაშაძის თქმით, ხელმოწერების შეგროვება აქტიურად მიმდინარეობს. აღნიშნული განცხადება ვაშაძემ ოპოზიციური პარტიების გაერთიანება - "მილიონი ხელმოწერა სამართლიანი არჩევნებისთვისა" და არასამთავრობო ორგანიზაციების შეხვედრისას მედიასთან გააკეთა. მისი თქმით, თუ ხელისუფლება ამ ცვლილებებს არ დათანხმდება, ეს იქნება კიდევ დამამტკიცებელი, რომ ქვეყანაში ავტორიტარული რეჟიმია ჩამოყალიბებული.

„გაერთიანებულ ოპოზიციაში შემავალი ყველა პარტია, ყველა ჩვენი პარტნიორი პარტია, რომელიც ჩვენთან არაა გაერთიანებული, ყველა აგროვებს ხელმოწერებს და რაღაც ციფრები უკვე შემოვიდა, თუმცა მე ნებართვა არ ამიღია, რომ ეს დავასახელო. დამიჯერეთ 230-250 ათას ხმას ძალიან სწრაფად შევაგროვებთ. გამომდინარე იქიდან, რა კამპანიაც ჩავატარეთ საპრეზიდენტოზე, ყველაფერი არის შემოწმებულ-გადამოწმებული. სიების შედგენა არ გაგვიჭირდება. ამ ხელისუფლების არაადეკვატურობიდან გამომდინარე, არ მგონია, დასთანხმდეს ცვლილებებს. რაც შეეხება ჩვენს მოკავშირეებს, ეუთოს, ყველა იმ სახელმწიფოს, რომელსაც საქართველოს დემოკრატია აღელვებს, მათ კიდევ ერთი არგუმენტი ექნებათ, რომ დარწმუნდნენ, საქარათველოში ჩამოყალიბდა ავტორიტარული რეჟიმი. რომელიც ლამის საოკუპაციო რეჟიმად გადაიქცა.“- განაცხადა გრიგოლ ვაშაძემ.