საქართველოს მესამე პრეზიდენტმა მიხეილ სააკაშვილმა „ნაციონალურ მოძრაობაში“ ცვლილებების აუცილებლობასთან დაკავშრებით განცხადება გაკეთა. აღნიშნულს პარტიის რიგებში გამოეხმაურნენ.

პარტიის ერთ-ერთი ლიდერის, რომან გოცირიძის განცხადებით, პარტიას განახლება და ახალი სახეები სჭირდება. მისი განცხადებით, ცვლილებების შესახებ ინფორმაცია პარტიის ყრილობაზე გახდება ცნობილი:

„დადგა პარტიის სერიოზული განახლების საკითხი, ახალი ენერგიის მიცემის საკითხი, ამიტომ, მალე პარტიაში მოხდება შესაბამისი ცვლილებები. იქნება პარტიის ყრილობა და პარტია, როგორც დღევანდელი პოლიტიკური ცხოვრების ლიდერი და ლოკომოტივი, თუ შეიძლება, ასე ითქვას, ოპოზიცური ფლანგის, საჭიროებს შემდგომი ენერგიის მიცემას, განახლებას,“ - განაცხადა გოცირიძემ.

მისივე განცხადებით, ხელისუფლება მიხეილ სააკაშვილს ქვეყანაში შემოსვლის საშალებას არ აძლევს, ამის გამო კი იგი შიდაპარტიულ ცხოვრებაში ვერ მონაწილეობს.

„შეუძლებელია „ნაციონალური მოძრაობის“ გამიჯვნა მიხეილ სააკაშვილისგან. ის არის ამ პარტიის შემქმნელი, ლიდერი, მაგრამ დღეს აქ საუბარია ადგილობრივი სტრუქტურების განმტკიცებაზე, ვინაიდან, მიხეილ სააკაშვილი ხელისუფლების უსამართლო ქმედებების გამო უშუალოდ შიდაპარტიულ ცხოვრებაში ვერ ღებულობს მონაწილეობას,“ - განაცხადა რომან გოცირიძემ.