ოპოზიცია და სამოქალაქო საზოგადოება სამხედრო სამსახურთან დაკავშირებით სესიაშვილის ინიციტივას არაკონსტიტუციურად მიიჩნევს

პოლიტიკა - 10:26, 18 Mar, 2019

1111

ოპოზიცია და სამოქალაქო საზოგადოება საპარლამენტო უმრავლესობის წევრის, ირაკლი სესიაშვილის ინიციატივას, რომელიც სამხედრო სავალდებულო სამსახურში გაწვევის გადავადებას ეხება, არაკონსტიტუციურად მიიჩნევს. სესიაშვილის ინიციტივით, სამხედრო სავალდებულო სამსახურის გადავადების უფლებით ისარგებლებენ მხოლოდ მართლმადიდებელი მღვდელმსახურები ან სასულიერო სასწავლებლის სტუდენტები. რაც იმას ნიშნავს, რომ სხვა აღმსარებლობის მოქალაქეებს, რომლებიც სასულიერო საქმიანობას ეწევიან სავალდებულო სამსახურის გადავადების უფლება შეეზღუდებათ.

ინიციატივის მხარდაჭერაზე უარს აცხადებს ოპოზიცია და მას დისკრიმინაციულს და არაკონსტიტუციურს უწოდებს.

„მე ვფიქრობ ეს ინიციატივა სერიოზულად დასამუშავებელია და კორექტირება არის შესატანი. იმიტომ, რომ ამ ფორმით, რაც მოვისმინეთ და ვნახეთ, ვფიქრობთ, რომ ეს არის დისკრიმინაციული. ჯარი უნდა იყოს იმგვარი, რომ ასე მასიურად ადამიანები არ ცდილობდნენ თავი დააღწიონ სამხედრო სამსახურში გაწვევას,“- განაცხადა „ევროპული საქართველოს“ წევრმა გიგი წერეთელმა.

პარლამენტის თავდაცვისა და უშიშროების კომიტეტის თავმჯდომარის ინიციატივას იაფფასიან პოპულიზმს უწოდებენ, „ნაციონალური მოძრაობის“ წევრები.

პარტიაში ამბობენ, რომ კანონპროექტი არ შეესაბამება არც ქვეყნის კანონმდებლობას, არც კონსტიტუციას და არც ქვეყანაში არსებულ ვითარებას.

„ამგვარი გადაწყვეტილებით დაზარალდება სხვა კონფენსიები, რომლებიც აერთიანებს ჩვენს მოქალაქეებს, ძალიან კარგ პატრიოტებს,“-განაცხადა გიორგი ბარამიძე.

არასამთავრობო ორგანიზაციების წარმომადგენლები ამბობენ, რომ უმრავლესობის მიერ შემუშავებული პროექტი მომავალში არაერთ პრობლემას შექმნის. ერთ-ერთ მწვავე და მოსალოდნელ პრობლემად კი საზოგადოებაში უთანასწორო ვითარების შექმნა სახელდება. მათი განმარტებით, აღნიშნულ ინიციატივას პარლამენტმა მხარი არ უნდა დაუჭიროს.

„ეს ინიციატივა არის დისკრიმინაციული იმიტომ რომ გამოყოფს გარკვეულ ჯგუფს რელიგიის ნიშნით და თუ ამას კანონის სახე მიეცემა ეს ჩაითვლება საკანონმდებლო დონეზე რელიგიის ნიშნით დისკრიმინაციად, რაც თავისთავად იქნება სხვადასხვა რელიგიური ჯგუფების მიმართ სეგრეგეციის წამახალისებელი“-აცხადებს საქართველოს ახალგაზრდა იურისტთა ასოციაციის ადამიანის უფლებების პროგრამის დირექტორი ქეთევან შუბაშვილი.