"გვაგორავეს და გვათრიეს... პირიდან სისხლი გადმოსდიოდა" - ზაქრო ამონაშვილის ოჯახი პოლიციას ცემასა და ზეწოლაში ადანაშაულებს

პოლიტიკა - 09:48, 18 Mar, 2019

1376

გურჯაანის მუნიციპალიტეტის სოფელ კალაურში პოლიციას ახალგაზრდის ცემასა და ზეწოლაში ადანაშაულებენ. ახლობლების ინფორმაციით, 24 წლის ზაქრო ამონაშვილს სამართალდამცველები ფიზიკურად გაუსწორდნენ. მათივე მტკიცებით, მას დაზიანებები სახის არესა და მკლავზე აქვს მიყენებული.

დედის თქმით, ზაქრო ამონაშვილს თბილისში მომხდარი ინციდენტის გამო ედავებოდნენ. თუმცა, ახალგაზრდას ბრალი არ წარუდგინეს.

თვითმხილველების განცხადებით, პოლიციელები ამონაშვილის მანქანაში ძალით ჩასმას და წაყვანას აპირებდნენ, როდესაც მას დედა დაეხმარა და შვილის განყოფილებაში გადაყვანის საშუალება არ მისცა. ფიზიკური დაზიანებები მასაც აღენიშნება

ფიზიკური შეურაცხყოფის გარდა ამონაშვილები პოლიციას მუქარაში ადანაშაულებენ. ოჯახმა გენინსპექციას და სახალხო დამცველის აპარატს უკვე მიმართა.

"მივადექით ამ მდგომარეობას, რომ ბავშვი არის მოთხუპნული მთლიანად, პირიდან სისხლი გასდის და კონკრეტულად მიზეზს ვერ მეუბნებიან, რატომ მიათრევენ და სად მიჰყავთ. დაბლა გვაგორავეს და გვათრიეს და ეს იყო კარგად ნაცემი. პოლიციელს ხელით ჰყავდა დაჭერილი, თვითონ მანქანაში იჯდა და ესენი ზედ ხელზე ხტუნაობდნენ. ხელზე აქვს დაზიანებები, პირიდან სისხლი გადმოსდიოდა,"-აცხადებს ზაქრო ამონაშვილის დედა, მაია ამონაშვილი.

შსს-ს ცნობით, პოლიციელები ზაქრო ამონაშვილთან სასამართლოს გადაწყვეტილების გასაცნობად იყვნენ ჩასულები. საქმე ეხება ამონაშვილის მხრიდან ცივი იარაღის ტარებას. ახალგაზრდა სასამართლო პროცესებს თავს არიდებს.