ლევან ხაბეიშვილის ინფორმაციით, დედაქალაქის მერიამ გენერალურ გეგმაში ცვლილებები მას შემდეგ შეიტანა რაც ბოტანიკური ბაღის ნაწილისთვის, ზონალური სტატუსის შეცვლაზე სიუჟეტი მედიაში გავიდა.

როგორც აღმოჩნდა, 14 ათასზე მეტ კვადრატულ მეტრ მიწის ნაკვეთს, ზონალური სტატუსი ეცვლებოდა.

ტერიტორია ზუსტად ბიძინა ივანიშვილის ეზოს მომიჯნავედ მდებარეობს, სწორედ ამიტომ ოპოზიციაში დარწმუნებულები არიან, რომ დედაქალაქის მერია ბიძინა ივანიშვილის ინტერესების გატარებას ცდილობდა.

ვიცე-მერი, მაია ბითაძე კი ამტკიცებს, რომ პროექტში ტექნიკური ხარვეზი იყო. დღეს ხაბეიშვილმა ბითაძეს ჰკითხა, ადასტურებდა, თუ არა, რომ გუშინ ბიძინა ივანიშვილის მეზობლად მდებარე 14 500 კვ. მეტრს რეკრეაციული ზონა 2-ის სტატუსი ედო. რაზეც მას ბითაძემ უპასუხა, რომ გენგეგმაში ეს ხარვეზი უკვე შვიდი თვეა არის.

ხაბეიშვილის კითხვაზე, „ხომ სწორი მითქვამს?“ ბითაძე პასუხობს: „კი, მაგრამ აბსოლუტურად ტყუილია, ის მოსაზრებები, რაზეც საუბრობდით, ვარაუდები და ა.შ.“.

თავად ბითაძე ირწმუნება, რომ ცდომილების შესახებ რამდენიმე თვის წინ გაარკვიეს. კითხვაზე, მაშინ რატომ მიაწოდეს ინფორმაცია „სითი ინსტიტუტს“ მხოლოდ გუშინ, მას შემდეგ, რაც ინფორმაცია "კურიერში" გავიდა, ბითაძემ აღნიშნა: „ცდომილების შესახებ გავიგეთ რამოდენიმე თვის წინ. მე ერთ რამეს ვადასტურებ, თუ გნებავთ ამოვიღოთ „სითი ინსტიტუტის“ მიერ თავდაპირველად შემოტანილი დოკუმენტი, რაც გასწორდა, მაგრამ ონლაინ ტასზე არ იქნა გასწორებული.“

ასევე კითხვაზე, თუ რატომ უარყო გუშინ მერიამ გავრცელებული ინფორმაცია, რომლის მიხედვითაც, ივანიშვილის სასახლის მეზობლად ბოტანიკური ბაღის ტერიტორიაზე სამშენებლო ნებართვა გაიცემოდა, ბითაძე ამბობს, რომ გუშინ მათ მხოლოდ ის განაცხადეს, რომ ამ ტერიტორიაზე უფლებრივი ზონირების მიხედვით, რეკრეაციული ზონა 2-ის მიუხედავად, მშენებლობა ვერ განხორციელდებოდა.

კითხვაზე, რატომ დამალეს გუშინ ხარვეზის არსებობა თუ ეს ხარვეზი მართლაც იყო, ბითაძემ ხაბეიშვილის იუმორით უპასუხა:

"იმიტომ დავმალეთ, რომ ეს იყო ძალიან დასამალი საკითხი და ამიტომ დავმალეთ"-ამბობს ბითაძე.