ანაკლიის ღრმაწყლოვანი პორტის მშენებლობა - ანაკლიის განვითარების კონსორციუმის დირექტორის ლევან ახვლედიანის განცხადებით, სამშენებლო სამუშაოების ნაწილი დაგეგმილზე ადრე ჩატარდა, მაგრამ „თიბისი ბანკის“ ირგვლივ განვითარებულმა პროცესებმა პროექტს ხელი შეუშალა:

„სამშენებლო პროცესი მიდის დაგეგმილი გრაფიკის მიხედვით. 600 მლნ დოლარი რაც სჭირდება ამ პროექტს მობილიზებულია. კონსორციუმი ყველაფერს აკეთებს, რომ სწრაფად დასრულდეს მოლაპარაკებები, რომლებიც მიმდინარეობს მთავრობასა და ბანკებს შორის.

უცხოელმა ინვესტორებმა 500 მლნ დოლარის ნდობა უნდა გამოუცხადონ ქვეყანას და კონსორციუმს, შესაბამისად, მნიშვნელოვანია, რომ მთავრობასა და კონსორციუმს შორის არ იყოს დაპირისპირება და პროექტის შემსრულებელებს მხარს უჭერდეს მთავრობა. ამ შემთხვევაში მთავრობაზე არაა სამშენებლო რისკი, ამ რისკს იღებს კონსორციუმი. ჩვენ არ შეგვიწყვეტია ინვესტორებთან მუშაობის პროცესი, თუმცა, ჩემი აზრით, საჭიროა ამ ყველაფრს ნათელი მოეფინოს და დასრულდეს, რათა ჩვენ შევძლოთ პორტის აშენებისთვის შემდეგი ნაბიჯების გადადგმა", - აცხადებს ახვლედიანი.