"რუკაზე იყო ლაქა, ხარვეზია და ჩასწორდება"- საკრებულოს უმრავლესობა ივანიშვილის სასახლის მოსაზღვრე ტერიტორიისთვის სტატუსის შეცვლის მცდელობას უარყოფს

პოლიტიკა - 13:03, 15 Mar, 2019

1247

დედაქალაქის გენერალური გეგმა და მორიგი სკანდალი - მერიას გენგეგმაში ოპოზიციის მიერ გასაჯაროვებული ფაქტების შემდეგ, სავარაუდოდ ცვლილებები შეაქვს.

საუბარია ბოტანიკური ბაღის 14 ათას კვადრატულ მეტრზე, რომელსაც სტატუსი უნდა შეეცვალოს და მასზე მშენებლობის ნებართვა გაიცეს. აღსანიშნავია, რომ ეს ტერიტორია სწორედ ბიძინა ივანიშვილის სოლოლაკის სასახლეს ესაზღვრება.

დედაქალაქის საკრებულოს ურბანული დაგეგმარებისა და საქალაქო მეურნეობის კომისიის თავმჯდომარე რევაზ სოხაძე აცხადებს, რომ ფაქტები, რომელიც ოპოზიციამ გაასაჯაროვა ტექნიკური ხარვეზი იყო და გამოსწორდება:

„ბოტანიკური ბაღი არის ძეგლის სტატუსის მატარებელი და ამიტომ ბოტანიკურ ბაღს მიუხედავად ამისა, თქვენი გაშუქებული სიუჟეტი ვნახე, არანაირი საფრთხე არ ემუქრება. ის, რაც არის არის ტექნიკური ხარვეზი და უნდა გასწორდეს. გასწორდება, შეიცვლება, ეს ტექნიკური ხარვეზი გასწორდება. რა თქმა უნდა ეს იყო ტექნიკური ხარვეზი,“-აცხადებს საკრებულოს ურბანული დაგეგმარების და საქალაქო მეურნეობის კომისიის თავმჯდომარე რევაზ სოხაძე.

საკრებულოს თავმჯდომარეც რუკაზე არსებულს ხარვზეზზე მიუთითებს:

“რუკაზე შესაძლოა, იყო ლაქა ხარვეზის, მაგრამ მიღებასთან ერთად გენერალური გეგმა რომ იქნება მიღებული კომისიებზე, თქვენ დაესწრებით გექნებათ საშუალება, აღნიშნული ტერიტორია არის ძეგლი და ამავე დროს იქნება ამ ტერიტორიაზე გავრცელებული სარეკრეაციო ზონა 1-ის სტატუსი,“-აცხადებს გიორგი ტყემალაძე.