ოკუპირებულ აფხაზეთში 29 წლის ირაკლი კვარაცხელიას გაურკვეველ ვითარებაში გარდაცვალების ფაქტს საქართველოში საფრანგეთის ელჩი პასკალ მენიე გამოეხმაურა. დიპლომატის განცხადებით, ოკუპირებულ ტერიტორიებზე ადამიანის უფლებები უხეშად ირღვევა. იგი იმედს გამოთქვამს, რომ გამოძიება ორი დღის წინ მომხდარ ფაქტს დაადგენს და გაირკვევა თუ რა მოხდა რეალურად:

„პირველ რიგში, მინდა გულწრფელად მივუსამძიმრო გარდაცვლილის ოჯახს. ყოველ ჯერზე, როდესაც ადგილი აქვს მსგავს შემთხვევებს, ეს წარმოადგენს ადამიანის უფლებების უხეშ დარღვევებს ოკუპირებულ ტერიტორიებზე. უაღრესად შეშფოთებულები ვართ. დიდი იმედი გვაქვს, რომ გამოძიება, რომელიც ამჟამად მიმდინარეობს, იქნება გამჭირვალე კეთილსინდისიერი და დადგინდება რეალობაში რა მოხდა. იმიტომ რომ მედიიდან ძალიან სხვადასხვაგვარი ინფორმაცია მოდის, მაგალითად თვითმკვლელობის, სასტიკად ცემის თუ სხვა ფაქტების შესახებ, რაც გარკვეულ დაბნეულობას იწვევს. თუმცა ფაქტი, რომ ახალგაზრდის გარდაცვალება მოხდა რუსეთის სამხედრო ბაზაზე, არის საგულისხმო ინფორმაცია და საჭიროა გამახვილდეს ყურადღება,“ - აცხადებს პასკალ მენიე.