ენერგეტიკის მინისტრი და კორპორაციის გენერალური დირექტორი გაზის ძებნა-ძიებითი ბურღვის სამუშაოებს დაათვალიერებენ

ბიზნესი & ეკონომიკა - 12:57, 24 Sep, 2013

1804

25 სექტემბერს საქართველოს ენერგეტიკის მინისტრი კახა კალაძე საქართველოს ნავთობისა და გაზის კორპორაციის გენერალურ დირექტორთან დავით თვალაბეიშვილთან და ინვესტორ კომპანია "ჯინდალ პეტროლეუმ ჯორჯია ლიმიტედი"-ს წარმომადგენლებთან ერთად სამგორში ახალ ჭაბურღილზე მიმდინარე ბურღვის სამუშაოებს დაათვალიერებს.
ბურღვითი სამუშაოები XIB სალიცენზიო ფართობზე, სამგორის სამხრეთი თაღის საბადოზე 17 აგვისტოს დაიწყო. ინდურ კომპანია `ჯინდალ პეტროლეუმ ჯორჯია ლიმიტედ~-ს უკვე გაბურღული აქვს 1590 მეტრი. დაგეგმილია ჭაბურღილის 4000 მეტრამდე გაბურღვა. სამუშაოების მიზანია ქვედა-ეოცენურ ქანებში გაზის ბუდობების აღმოჩენა.
ინდურმა კომპანიამ მიმდინარე წელს ერთი პროექტი წარმატებით უკვე განახორციელა და სართიჭალის საბადოზე ნავთობის მოპოვება ახალი ჭაბურღილდან დაიწყო. კომპანიას იმედი აქვს, რომ სამხრეთი თაღის საბადოზე მიმდინარე სამუშაობიც წარმატებით დასრულდება. ამჯერად საუბარია გაზის აღმოჩენის პერსპექტივასთან, რასაც, თავისთავად, უდაოდ დიდი მნიშვნელობა აქვს როგორც ინვესტორისთვის, ისე ქვეყნისათვის. "ჯინდალ პეტროლეუმ ჯორჯია ლიმიტედმა" საქართველოში საქმიანობა 2009 წელს დაიწყო. ძებნა-ძიებისა და მოპივების სამუშაოებს კომპანია ამჯამად 5 სალიცენზიო ბლოკზე აწარმოებს. წელიწადში ნავთობის მოპოვება საშუალოდ 17 ათას ტონას შეადგენს. 2013 წლის მარტში, სამგორის საბადოს სართიჭალის უბანზე "ჯინდალ პეტროლეუმ ჯორჯია ლიმიტედმა" უკვე გაბურღა ახალი ჭაბურღილი, საიდანაც საწყისმა მოპოვებამ დღეში 41-43 ტონა სუფთა ნავთობი შეადგენდა.