"ჩვენ კი არ წაგვიყენეს ბრალდება, დაადანაშაულეს ამერიკის მთავრობა, რომ მიზანმიმართულად პოლიტიზირებულ ანგარიშებს აქვეყნებს"- ბენიძე

პოლიტიკა - 13:15, 14 Mar, 2019

1174

„სამართლიანი არჩევნებისა და დემოკრატიის საერთაშორისო საზოგადოების" აღმასრულებელი დირექტორი მიხეილ ბენიძე "ნიუპოსტთან" ამერიკის სახელმწიფო დეპარტამენტის მწვავე ანგარიშს ეხმაურება.
ბენიძე ამბობს, რომ 47-გვერდიან დოკუმენტში ყველა იმ პრობლემებზეა საუბარი, რომელზეც მესამე სექტორი ხელისუფლებას წლების განმავლობაში მიუთითებდა.

ბენიძე ხელისუფლებას მოუწოდებს, რომ უმჯობესია სახელმწიფომ აშშ-ს სახელმწიფო დეპარტამენტის მწვავე ანგარიში გაითვალისწინოს და ჯოხს მესამე სექტორზე ნუ გადატეხავენ.

მიხეილ ბენიძე სასმართლოს წარმომადგენელთა და სახელისუფლებო გუნდის წევრების განცხადებას, რომ სახელმწიფო დეპარტამჯენტი არასამთავრობოებმა შეიყვანეს შეცდომაში სასაცილოს უწოდებს.

მისი თქმით, მსგავსი შეფასებები აზიანებს ორი ქვეყნის სტრატეგიულ ურთიერთობას და ქვეყნის იმიჯზე უარყოფით ზეგავლენას მოახდენს.

"ჩვენ კი არ წაგვიყენეს ბრალდება, რეალურად მათ დაადანაშაულეს ამერიკის მთავრობა. სრულიად სასაცილოა, მეთოფიშვილისა და მიქაუტაძის განცხადებები. როგორც ჩანს, ეს "ქართული ოცნების" საერთო მესიჯბოქსია. სხვა პირებისგანაც მოვისმინეთ, რომ თითქოს ამ კვლევას არ უნდა მივანიჭოთ დიდი ყურადღება, რადგან თურმე ეს ეყრდნობა მესამე სექტორის მიერ მიწოდებულ ინფორმაციას. ჯერ ერთი ამერიკის შეერთებული შტატები ნებისმიერ მიწოდებულ ინფორმაციას ასე არ აღრიცხავს საკუთარ ანგარიშზე, ისინი მხოლოდ სარწმუნო ინფორმაციას ეყრდნობიან, რომელიც გამოხატავს ამა თუ იმ მიმართულებით არსებულ ვითარებას. ამიტომ მსგავსი განცხადებები და ბრალდებები შეურაცხმყოფელია, რადგან მათ ან ჰგონიათ, რომ აშშ-ის მთავრობა ვერ აცნობიერებს და ვერ იაზრებს რა ინფორმაცია უნდა ასახოს ანგარიშში. ანდა მეორე და კიდევ უარესი, რომ სახელმწიფო დეპარტამენტი მიზანმიმართულად პოლიტიზირებულ ანგარიშებს აქვეყნებს. იმის გარდა, რომ სახელისუფლებო შტოების წარმომადგენელთა მხრიდან ეს არის რბილად რომ ვთქვათ, სასაცილო განცხადებები, ის აზიანებს ქვეყნის ინტერესებს და ამერიკის შეერთებულ შტატებთან ურთიერთობას. აშშ-ის დეპარტამენტი მსგავსი ანგარიშებით მინიშნებებს უკეთებენ ხელისუფლებებს, რომ რიგი მიმართულებებით პრობლემებია. ამიტომ ხელისუფლების ადგილზე დავფიქრდებოდი და სასაცილო მდგომარეობაში არ ჩავიგდებდი თავს"- აღნიშნა მიხეილ ბენიძემ.

მისი თქმით, კარგი იქნება თუ მმართველი პოლიტიკური ძალა და სასამართლო სექტორი პრობლემების სიმწვავეს დაინახავს და ჯოხს მესამე სექტორზე არ გადატეხავს.

"კარგი იქნებოდა ჩვენ გავლენა გვქონდეს პირველ რიგში საქართველოს ხელისუფლებაზე, იმისთვის რომ დროულად აღმოვფხვრათ ის პრობლემები რაც სახეზეა და დავეხმაროთ ამ ქვეყანას რეფორმებში, რომ ევროატლანტიკურ სივრცეში გაწევრიანებას დაეხმაროს ეს რეფორმები. ჩემი რჩევა იქნება ამ ხალხისადმი, რომ ანგარიშს მოეკიდონ სერიოზულად, გაითვალისწინონ ის მინიშნებები რაც ასახულია დოკუმენტში და მოუსმინონ იმ სიგნალებს რაც მეგობარი ქვეყნებიდან მოდის"- თქვა ბენიძემ.