„რუსეთი კლავს! ყველა ინსტრუმენტს და ტრიბუნას გამოვიყენებთ, რომ შეიგნოს

„რუსეთი კლავს! ყველა ინსტრუმენტს და ტრიბუნას გამოვიყენებთ, რომ შეიგნოს - ის ოკუპანტია“- სესიაშვილი

პოლიტიკა - 12:54, 14 Mar, 2019

993

საქართველოს პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი ოკუპირებულ აფხაზეთში საოკუპაციო რეჟიმის მორიგ მსხვერპლზე ირაკლი კვარაცხელიაზე საუბრისას აცხადებს, რომ რუსეთი კლავს და ვერ იღებს პასუხისმგებლობას ადამიანის უფლებების დაცვასა და სიცოცხლეზე.

სესიაშვილის თქმით, საქართველოს ხელისუფლებამ უნდა გამოიყენოს ყველა ტრიბუნა, რათა რუსეთი აიძულონ, რომ ოკუპირებულ რეგიონებში ადამიანის უფლებათა დარღვევაზე პასუხისმგებლობა იტვირთოს.

„ჩემთვის და საქართველოსთვის რუსეთი კლავს, რუსეთი ვერ იღებს პასუხისმგებლობას ელემენტარულ ადამიანის სიცოცხლეზე, რაც არის ყველაზე მთავარი. ამიტომ ჩვენ ნებისმიერ შემთხვევაში მივმართავთ საერთაშორისო საზოგადოებას, ყველა ინსტრუმენტს, ყველა ტრიბუნას გამოვიყენებთ, რომ რუსეთმა შეიგნოს რომ ის არის ოკუპანტი, მან უნდა აიღოს პასუხისმგებლობა იმაზე, რომ ის არის ეფექტური მოცემულობით ანგარიშვალდებული და პასუხისმგებელი ოკუპირებულ ტერიტორიაზე ნებისმიერი ადამიანის უფლებებზე. ამაზე მინიმუმ მან უნდა მოახდინოს ადეკვატური რეაგირება“-განაცხადა სესიაშვილმა.