ევროპარლამენტის რეზოლუცია ოკუპაციას გმობს და რუსეთს საქართველოს ტერიტორიებიდან შეიარაღებული ძალების გაყვანისკენ მოუწოდებს

პოლიტიკა - 12:50, 14 Mar, 2019

1198

ევროპარლამენტმა ევროკავშირისა და რუსეთის ურთიერთობების შესახებ რეზოლუცია დაამტკიცა, რომელშიც საქართველოზეც არის საუბარი.

დოკუმენტს ევროპარლამენტის 402-მა წევრმა დაუჭირა მხარი, წინააღმდეგ წავიდა 163, 89 დეპუტატმა კი თავი შეიკავა.

რეზოლუციაში ხაზგასმულია, რომ რუსეთის მიერ ყირიმის უკანონო ოკუპაცია და ანექსია, უკრაინის აღმოსავლეთში მიმდინარე შეიარაღებულ კონფლიქტში პირდაპირი და არაპირდაპირი ჩართულობა და საქართველოსა და მოლდოვის ტერიტორიული მთლიანობისადმი განგრძობითი ძალადობა წარმოადგენს საერთაშორისო სამართლის ნორმების, დემოკრატიული პრინციპებისა და ფუნდამენტური უფლებების მიზანმიმართულ დარღვევას. რეზოლუცია მკაცრად გმობს ადამიანის უფლებების დარღვევებს ოკუპირებულ ტერიტორიებზე.

„ევროპარლამენტი ადასტურებს საქართველოს სუვერენიტეტისა და ტერიტორიული მთლიანობის ურყევ მხარდაჭერას და ითხოვს რუსეთის ფედერაციისგან საქართველოს ტერიტორიების, აფხაზეთისა და ცხინვალის რეგიონის ოკუპაციის შეწყვეტას და საქართველოს სუვერენიტეტისა და ტერიტორიული მთლიანობის სრულ პატივისცემას“- რეზოლუციაში ევროპარლამენტი ხაზს უსვამს რუსეთის მიერ 2008 წლის 12 აგვისტოს შეთანხმებით ნაკისრი ვალდებულებების შესრულების აუცილებლობას, კერძოდ საქართველოს ტერიტორიიდან რუსეთის შეიარაღებული ძალების გაყვანას.