გაერთიანებული ოპოზიციის "ძალა ერთობაშიას" ლიდერი გრიგოლ ვაშაძე აშშ-ის სახელმწიფო დეპარტამენტის კრიტიკულ ანგარიშს ეხმაურება.

მისი თქმით, ქვეყნის მიღწევრები დემოკრატიის სფეროში უმოწყალოდ არის სანაგვე ყუთში გადაგდებული საქართველო დგას რუსეთის ფედერაციის თარგზე გამოჭრილი რეპრესიული რეჟიმის ჩამოყალიბების გზაზე.

„როდესაც სახელმწიფო დეპარტამენტის ადამიანის უფლებების მოხსენებაში პოულობ იმას, როგორ ეძახის საქართველოს პარლამენტის ე.წ. სპიკერი არასამთავრობო ორგანიზაციებს ფაშისტებს, როდესაც ზუსტად არის აღწერილი ყველა მტკივნეული წერტილი, რომელიც ჩვენ გვაქვს ჩვენს სახელმწიფოებრიობაში, დემოკრატიის ხარისხში და ე.წ. ხელისუფლების ურთიერთობაში საზოგადოებასთან, გულწრფელად მენანება, რომ საქართველოს მიღწევები, რომელიც გვქონდა დემოკრატიის სფეროში, ასე უმოწყალოდ და უგონოდ არის გადაგდებული სანაგვე ყუთში. საქართველოში ჩვენი მოკავშირეების დიპკორპუსია, რომელთაც აქვთ შესანიშნავი საინფორმაციო ქსელი და ღებულობენ ინფორმაციას ყველაფერზე, რაზეც საჭიროა და თავის დედაქალაქებს ამას აცნობებენ. ნურავის, შუშის სასახლიდან დაწყებული კანცელარიით დამთავრებული, ნუ ჰგონიათ, რომ აქ ვიღაც სულელია, რომელიც თავის დედაქალაქს არ უკეთებს ინფორმირებას იმაზე, რომ საქართველო დგას რუსეთის ფედერაციის თარგზე გამოჭრილი რეპრესიული რეჟიმის ჩამოყალიბების გზაზე" - აღნიშნა გრიგოლ ვაშაძემ.