„კორიფციული შემთხვევები, ტენდერების სკანდალი თუ რუსული "დედოვშინა" უსაფრთხოების სექტორში კრიზისის მაჩვენებელია“

„კორიფციული შემთხვევები, ტენდერების სკანდალი თუ რუსული "დედოვშინა" უსაფრთხოების სექტორში კრიზისის მაჩვენებელია“ - ბათუ ქუთელია

პოლიტიკა - 16:41, 13 Mar, 2019

1073

"საქართველოს ატლანტიკური საბჭოს" ვიცე-პრეზიდენტი, ბათუ ქუთელია ქვეყნის უსაფრთხოების სფეროში არსებულ სისტემურ პრობლემებზე საუბრობს და ამბობს, რომ მმართველი პოლიტიკური პარტიის მიერ მიღებულმა კონსტიტუციამ, ეს პრობლემა კიდევ უფრო გააღრმავა.

ქუთელიამ "ნიუპოსტთან" თავდაცვის სამინისტროს სკანდალზე ისაუბრა, სადაც წვევემდელთა ცემისა და ფულის გამოძალვის ფაქტებმა იმატა.

"ჯარში და ზოგადად, უსაფრთხოების სექტორში ძალიან სერიოზული პრობლემებია. ქვეყანაში მოშლილია უსაფრთხოების სექტორის დაგეგმვის, მართვის და კონტროლის ინსტიტუციური სისტემა, რაც პირველ რიგში გამოიწვია კონსტიტუციურმა ცვლილებებმა, სადაც გააზრებული არ იყო უსაფრთხოების კომპონენტი და მისი ინსტიტუციური უზრუნველყოფა. ასეთი სისტემური პრობლემის შედეგია სწორედ მსგავსი გამოვლინებები”- უთხრა „ნიუპოსტს“ ქუთელიამ.

"საქართველოს ატლანტიკური საბჭოს" ვიცე-პრეზიდენტი უსაფრთხოების თვალსაზრისით მთავარ გამოწვევად პრიორიტეტების არარსებობას ასახელებს.

„ინსტიტუციური მექანიზმი, უსაფრთხოების სექტორზე კონტროლი და მართვის ერთ-ერთი მთავარი ამოცანა პრიორიტეტების სწორად დაგეგმვა, შემდეგ მისი განხორციელება და ეფექტური ზედამხედველობაა, მათ შორის პარლამენტის მხრიდან. არცერთი ეს კომპონენტი დღეს არ ფუნქციონირებს. აქედან გამომდინარე, რასაც ჩვენ ვხედავთ, იქნება ეს კორუფციის შემთხვევები, ტენდერების სკანდალები, თუ რუსული, უკვე დავიწყებული "დედოვშინის" მაგვარი ფაქტები უსაფრთხოების სექტორში კრიზისის მაჩვენებელია"- აღნიშნა ექსპერტმა.

ბათუ ქუთელია საოკუპაციო რეჟიმის მიერ საქართველოს მოქალაქეების მკვლელობის ფაქტების გახშირებას ხელისუფლების არაეფექტურ მუშაობას უკავშირებს. ექსპერტის თქმით, რუსული პროვოკაციების განეიტრალების შესაძლებლობა ქართველ სპეციალისტებს აქვთ თუმცა ამისთვის პოლიტიკური ნება არ არსებობს:

"ეს პრობლემაც კავშირშია იმ ინსტიტუციურად მოშლილ უსაფრთხოების სისტემასთან, რომლის ამოცანაც ასეთი ტიპის გამოწვევებზე და პროვოკაციებზე შესაბამისი რეაგირების მოხდენა უნდა იყოს. მისი პირდაპირი ფუნქცია პრევენციაა. დღეს კი ვხედავთ, როგორ იტაცებენ ოკუპანტები ადამენებს საოკუპაციო ხაზიდან, პირდაპირ, საქართველო კონტროლირებად ტერიტორიაზე გვიკლავენ ადამიანებს და ითხოვენ გამოსასყიდს.

სამწუხაროდ, ეს არის არაფორმალური მმართველობის შედეგი, რომელიც კონკრეტულ პოლიტიკურ ინტერესზეა მორგებული.

უსაფრთხოების სტრუქტურებს ასეთი ტიპის პროვოკაციების თავიდან აცილება და შემდეგ სწორი რეაგირება შეუძლიათ, ასევე შესწევთ უნარი დამნაშავეების საერთაშორისო დონეზე პასუხისმგებლობის საკითხი დააყენონ, თუმცა ამის განხორციელებას სჭირდება პოლიტიკური მანდატი, კარგადა დაგეგმილი და შემდეგ კარგად განხორციელებული სტრატეგია. ამ ყველაფრის არარსებობა ქმნის ვაკუუმს, რომელსაც ჩვენი მოწინააღმდეგები, რუსები ეფექტურად იყეწნენებენ და ასეთი ტიპის პროვოკაციებით ცდილობენ ჩვენი მოქლაქეებისთვის ზიანის მიყენებას, რაც საბოლოოდ სახელმწიფოს დისკრედიტაციას იწვევს. თუ ასეთ სიტუაციებში სახელმწიფო იქნება უძლური უპასუხოს რუსულ პროვოკაციებს, ეს საბოლოოდ გამოიწვევს სახელმწიფო ეროზიას, შესაბამისად, სახელმწიფო ინსტიტუტების მიმართ ნდობა მცირდება, რაც ასუსტებს ჩვენს ეროვნულ უსაფრთხოებას"- თქვა ქუთელიამ.