მემკვიდრეობით მიღებული მიწის ფლობა მხოლოდ ეთნიკურად ქართველ უცხოეთის მოქალაქეს შეეძლება

პოლიტიკა - 13:17, 13 Mar, 2019

1258

„სასოფლო-სამეურნეო მიწის საკუთრების შესახებ“ კანონპროექტის მიხედვით, ყოველგვარი გამონაკლისის გარეშე, იკრძალება უცხო ქვეყნის მოქალაქე ფიზიკური პირის მიერ საქართველოში სასოფლო-სამეურნეო მიწის საკუთრების უფლება.

იურიდიული პირის შემთხვევაში კი, მიწას დაიკანონებს მხოლოდ ის, რომლის დომინანტი პარტნიორი ქართველია ანუ ფლობს კომპანიის წილის 50%-ზე მეტს.
კანონის პროექტი ადგენს საგამონაკლისო შემთხვევებსაც. კერძოდ, უცხოელ ფიზიკურ პირს შეიძლება გააჩნდეს სასოფლო-სამეურნეო დანიშნულების მიწა საკუთრებაში მემკვიდრეობის საფუძველზე.

მას შემდეგ, რაც სოციალურ ქსელში განხილვები მოჰყვა კანონში ამ ჩანაწერს, „საქმიანი დილის“ ეთერში კანონპროექტის ავტორმა და პარლამენტის აგრარულ საკითხთა კომიტეტის თავმჯდომარემ განმარტა, რომ საგამონაკლისო შემთხვევა მხოლოდ ეროვნებით ქართველ უცხო ქვეყნის მოქალაქეზე ვრცელდება და არანაირი გამონაკლისი უცხო ქვეყნის მოქალაქეებზე არ ვრცელდება.

„საუბარია, ქართველებზე, ემიგრანტებზე, რომლებსაც აქვთ შეცვლილი მოქალაქეობა. მილიონზე მეტი ემიგრანტია, რომლებიც გვინდა დავუბრუნოთ საქართველოს. ჩვენ პრიორიტეტს საქართველოს მოქალაქეებს ვანიჭებთ.

მემკვიდრეობაში ვგულისხმობ, მაგალითად, როცა მშობელი ცხოვრობს საქართველოში, მისი შვლი წავიდა გერმანიაში და მიიღო გერმანიის მოქალაქეობა. მას აქვს შესაძლებლობა დაბრუნდეს და დაეუფლოს ოჯახის მიწის ნაკვეთს მიუხედავად ტექნიკური მოქალქოებისა, ისაა ეთნიკურად ქართველი, ამიტომაა ამ ადამიანებზე საუბარი. არანაირი გამონაკლისი უცხო ქვეყნის მოქალაქეებზე არ ვრცელდება“, - განმარტავს ოთარ დანელია.